البرجر البيتي مقدم من مطبخ اكلات مني صالح

كتبت سمسمه سعد

البرجر البيتي

مقدم من مطبخ اكلات مني صالح

طعم حلو جدا وانضف كتير من بره وموفر معانا هايعمل كميه حلوه وبمكونات سهله وموجوده في بيوتنا
نقول بسم الله
المكونات
هاحتاج هنا ٢كيلو لحم ويكون ٢٠في الميه منه دهون ويتفرم وشين
وربع كيلو فول صويا منقوع نص ساعه ومعصور من الميه كويس جدا
بصله مبشوره ناعم ومعصور من الميه كويس هاحتاج فيها التفل والميه تركتها للمشويه او اي تتبيله
فنجان كاتشب
فنجان مسطرده
وبيضتين
و التوابل…. بصل بودر وتوم بودر وبابريكا وفلفل وملح وكزبره جافه مطحونه ناعم وحبهان بودر وكيسين من خلطه البرجر الجاهزه وانا بستعمل كنور
هاجيب كل المكونات اضيفها على بعض واعجن بيها بايدي كويس جدا لحد ماتتجانس كويس
ابتدي اخدها شويه شويه في الكبه واديهم لفتين في الكبه لحد مااقول الصويا تختفي مع اللحمه كويس اوي
اريحها ساعه في التلاجه بتكون احلى لما تيجي تشكيلها في المكبس
اخد كميه متساويه من أكياس التلاجه اقسمهم بالمقص نصين
اخد قطعه كويسه من البرجر واحطها جوه نص الكيس واحطها في المكبس واضغط عليها واسويها كويس تكون كلها في سوا واحد
واحفظهم في علبه في الفريزر بيفضل عندي شهر وزياده
اطلعه من الفريزر واجهز الجريل واخد شويه زيت بسيط وتسخن جدا وانزل ب البرجر واضغط باسبتيولا لحد ماتتحمر واقلب وهكزا لحد ماتستوي في حوالي عشر دقايق نار متوسطة واجهز الكيزر وادهنه مايونيز واعمل رقات من البصل والخص والخيار والطماطم ولو متاح جبنه شيدر واحط البرجر في النص واخدهم عالتوستر انتم وراحتكم في الفنيش واللي تحبوه في الاضافات والحمد لله
والف هنا

رئيس قسم المطبخ أ سمسمه سعد