صباح الفل يا بلدي : بقلم نبيل مصيلحي
ــ
أنا مصري
وطول عمري
هاكون مصري
وعمري في يوم ما هتغيَّر
أحن لها وأفديها بروح الروح
دي مصر الأم والعيله وست الكل
ــ
وتحلا القاعده ع القهوه
مع الصُحبه وفنجان شاي
وتحلا الفسحه في رحابها لحد الفجر
سميطة وحبة الدُوقّه
وحمص شامي بشطيطه جميل جدا
وتسمع عب الحليم ( حافظ ) وبعده ( الست )
على الكورنيش تلاغي النيل
وتهدي الحلوه عًقد الفل
ــ
دي مصر الحلوه يا اخوانا
وصبح القلب عيد وأمان
وأهرام دهشت العالم تاريخ وزمان
وقبلي وبحري ما يفرَّق ما بينها أوان
صباح الحب با بلدي
مساء الفل والياسمين
يا ماشيه في طريق النور
وفيكي بركة المولى تفيض ع الكل
ــ
يا مصر يا جنة الدنيا وموالها
يا واحة الراحه رحراحه لكل الناس
وراحة الأوليا فيكي دليل نبراس
يا مذكوره في أيات الله
يا محروسه بعيون الله
ومين زارك ما ينساكي
ومين حبك ما يسلاكي
عشان فيكي بتحلو الشموس والضل
ــ
يا مصر يا قلبنا وروحنا ونور العين
فداكي الدنيا والغالي يا نبع حنين
دا مين حبك نقدم له الهنا فدادين
ومين عاداكي نحفر له القبور ملايين
عشان أهلك رباطه متين
وجندك ع العدا قادرين
على عهد الولاء حالفين
وخطوتهم تهز الأرص
ولو واجهوا الحديد بيفل
ــ
ومين يكره يكون منك
ويتدفى بحنين حضنك
أنا منك .. أنا ابنك
أنا مصري
وطول عمري
هاكون مصري
وخدامك يا ست الكل
