عجينة البيتزا مقدمه من شيف وليد السعيد

كتبت سمسمه سعد

عجينة البيتزا

مقدمه من شيف وليد السعيد

هنعمل البيتزا فى البيت
وقدموها لكل حبايبكم بقلب جامد
لكل أخواتى وحبايبى  اللى سألوني على عجينة البيتزا بقدمها ليكم بأسهل طريقةوهشة وطرية بس نتبع الخطوات وهتكون معاكم أحلى بيتزا وأحلى من بيتزا المحلات كمان ودى هتكون أساس عجينة البيتزا ومنها تعملى أنواع كتيييير من البيتزا يالا بينا نبدأ وركزو معايا

المكونات

3 كوب دقيق
¾ كوب ماء دافئ
3 ملعقه كبيرة زيت زيتون
1 ملعقة كبيرة خميرة
1 ملعقة كبيرة سكر
1 ملعقة صغيرة ملح
وطبعاً جبنة موزيريلا

الصوص
°°°°°°°°°°°
طماطم مفرومة ومتسبكة كويس يعنى ميكونش فيها ماء خالص
وملح وفلفل وزعتر
وياسلام لو معلقة كاتشاب كبيرة

الطريقة
—————
أول حاجة نعملها ندوب الخميرة مع السكر فى الماء الدافئ كويس جداً ونغطيها ونسيبها على ما ننخل الدقيق ونضيف عليه الملح ونخلطه وبعد كده ننزل بالماء الدافئ بالخميرة وزيت الزيتون ودوغرى على العجان ولو مفيش عجان عادى اعجنى ولتى ياختى ومتقوليش متعرفيش اللت والعجن المهم هتعجنيها كويس على الأقل عشر دقايق مفهوم ركزو معاية كده عشان عايزين العجينة قاسية حبتين يعنى لو لينة معاكم عادى شوية دقيق وذودوها على العجينة بس بلاش تذودوها معايا أنا ونلمها قاصدى نلم العجينة وبعدين نسيبها ترتاح ½ ساعة على الأقل ليتضاعف حجمها ونقسمها قطع على قد الصوانى اللى هنفرد فيها وبعد ما نفردها فى الصوانى ندهنها بالصوص وعليها الجبنة الموزيريلا وعايزة تدلعيها ضيفى شوية جبنة شيدر مبشورة كمان وده اختيارى وبس خلاص ده الأساس وضيفى عليها من فوق أى حاجة تخطر على بالك وسميها باسمها بالفراخ أو بالسلامى ،بالزيتون ،بالخضار ،بالتونة بالجمبرى واه من الجمبرى

والف هنا

رئيس قسم المطبخ أ سمسمه سعد