عيد العمال للشاعر أحمد حمدي

قصيدة / عيد العمال
شاعر/ أحمد حمدى

اليوم دا عيد
طبعاً مجيد
عامل بلدنا ف كل حتة
ان كان قريب أو كان بعيد
مدن القناة أو وجه بحرى
مدن السواحل والصعيد
رافع شعاره..الصناعة مع العلم
من صغر سنّه مسك القلم
رسم تروس.. عامل يدوس
شغّل مصانع..جاب فلوس
عمل لبلده دور الريادة
فاتقدمت ويّا الأمم
شبابنا جه حرر بلاد
دق الوتاد ..رفع العماد
سادت وكبرت وأصبحت بين القمم
تيجى للصعيد
عمال تكسّر الحديد
يتمتعوا بعزم الشديد
وتشوف ف عينه كل الكرم
أما فى بحرى..
فمهنته بتزيده جاه
لو حتى شغله ومهنته
بيطوحوه ف أى اتجاه
يعمل بصبر ويقتدر ميقولش آه
وان شاف كسور فى اى شئ
مايسكت الا وقام بناه
وبتترسم ف ملامحه دى كل القيم
اقرى يا عين .. واكتب وسطّر يا قلم
مدن القناه أصل الصناعة البحرية
فوق السفن.. عمال كدة مية المية
بيعدو موج البحر وبكل الجَلَد
موجة غضب أو حتى موجة حنيّة
وبينضرب بيهم المثل ..ويّا الحِكم
وبيحملو أسمى الشيم
وبالقناه وصلوا لحد العالمية
وما اوصيكمش على بلدنا المحروسة
لاسكندرية.. أجمل تحية مخصوصة
عمالها فى الصيد ممتازين
جابو السمك وبسرعة حطّوه فى الخوصة
أما الحكاوى والغناوى لاهلها
ويّا بلدنا فى كتاب تاريخنا مدروسة
عمال بلدنا وهمّا لسة مروحين
ماشيين يقولو.. مصممين
من غير كلام
بالظبط احنا زى الجنود رمز السلام
فياريتكو مرّة توجهوا لينا اهتمام
وبقولّكم متشكرين
يا اهل الاصالة الطيبين
أقصد شبابنا وأهل مصر المخلصين
وبقولّكم كدا كلكم
فى كل عام دايماً يارب طيبين
#أحمد_حمدى_ناصف