هذا المقال مستوحي من مهرجان ( لاء لاء )الحقيقه اول مره الاقي فايده للمهرجانات علي الاقل بالنسبالي و وبرضه من وحي الاستاذ عباس الضو اللي بيقول (لاء) علي طول ده
في خضم التلوث السمعي والالفاظ الاكثر من بذيئه اللي بقت ميكروب وانتشروفي الواقع برضه انا مش من جمهور المهراجانات ولكني لا اهاجم الا البذئ منها الا اني وبطبيعه الحال مضطره اسمعها حتي ولو بالعافيه
استوقفني مطلع المهرجان ده وبرضه مش فاهمة الباقي بس هاخد من المهرجان مصلحتي اللي هي لاء لاء
وطبعا رائد كلمة (لاء) الاستاذ احمد عبد العزيز اللي طول مسلسل المال والبنون كان بيحاول يقنعنا ان استاذ عباس الضو قال (لاء) فاحنا لازم نقول زيه
(ومعرفش ليه) بس هو كده
اه وربنا كلمة لاء الساحره التي تحمل عصا مزينه بالماس عصا ال(لاء) التي عندما تشير بها اللي اي شئ اكبر من حجمه في لحظه يرجع لحجمه الطبيعي
في عصر الاستباحه والانتهازيه والسفسطه اصبحت الكلمه التي تنجيك هي (لاء) فبمجرد تحملك مسئولية نفسك ودخولك سباق الدنيا وسعيك لتوفير الحد المطلوب من الامان اصبحت معرض للاستنزاف كل لحظه تقريبا قد يتخطي الامر مجرد استنزاف مادي ليصل الي مرحلة الاستنزاف العاطفي والذي يجعلك تترك احلامك جانبا وتتفرغ لتحقيق احلام الاخرين
وفي لحظه ودون اي مقدمات تفيق علي اخر محطات حياتك دون انجاز يذكر
ودلوقتي فكر معايا كام مره عدت عليك في عمرك خسرت حاجه علشان ماقولتش لاء كام مره ضحيت بوقتك علشان اتكسفت تقول لاء كام مرة نسيت نفسك في محاولات الاستنزاف العاطفي من البعض ليك وعلشان كده فعلوا اوبشن (لاء)
واستاذ عباس الضو مش احسن منك في حاجه علي فكره لما قال
(لاء)
قول لاء لاي حد بيستنزف مشاعرك
قولا لاء لاي حد بيقنعك ان الغلط اسهل
قول لاء للي بيعطلك عن حلمك
قول لاء للي بيختار مصلحته علي حساب مصلحتك
قول لاء لمكالمة التليفون اللي مش في وقتك المناسب
قول لاء لعلاقة حب بتاخد منك اكتر مابتديك
قول لاء للي بيقطع عليك لحظات سعادتك
قول لاء للانتهازين المتسلقين المحبطين المستغلين المنتفعين اللوامين قول لاء للناس اللي علي طول مش راضيه قول لاء للي مش مقدرك قول لاء اللي بيستخدم سيف الحياء معاك طول الوقت قول لاء للي مش عايز يفهم
قول لاء باعلي صوتك للي مش هيخليك تعرف تجاوب عن السؤال ده
(عمرك فيما افنيت)
واعرف انك هتتحاسب عن نفسك وعن اعمالك مش بأراء الناس فيك
اقنعتك صح
هااااا قولت لاء
كلمة لاء طالعه منك زي السكرالحقيقه
