كتبت __ حياه هشام
ملف كامل عن الغسول للوجه…
فوايده وازاي تختاري اللي يناسب بشرتك وليه لازم تستخدمي اللي يناسب بشرتك مش اي نوع والسلام !!
اولا : يعني ايه غسول ؟
الغسول ده جيل منظف رغوي لتنضيف البشره وبيساعد علي توازن الدهون فيها
ايه الفرق بينه وبين الصابون ؟
الصابون في قلويات وكيماويات بتضر بشرتك وتنشفها ده غير انها معرضه دايما للبيكتريا والبيكتريا دي بتتنقل لوشك لما تغسلي بيها
تاني حاجه وهي انواع الغسول
طبي وتجميلي
الطبي بيستخدم للحالات اللي عندها حبوب ومشاكل ف وشها وعموما لازم كل بنت فينا يكونو عندها نوع غسول طبي علشان كل شهر هرموناتنا بتتغير وبتظهر حبوب ف بنستخدمه ف الفتره دي وبعد ما الحبوب تخف بنوقفه ونرجع الغسول التجميلي العادي بتاعنا واحسن انواع بالنسبالي ف الغسول الطبي هما (سينوبار وده للبشره الدهنيه جدا لانه بينشف الدهون ويقللها ؛ ناتري وده للبشره الدهنيه العاديه )
التجميلي بقي
ده بتسخدميه كل يوم الصبح وبليل علشان ينضف بشرتك من الاتربه والشوائب اللي ممكن تسبب حبوب ومشاكل ..
طيب ليه لازم استعمل المناسب لبشرتي ؟؟
علشان زي ما قولنا الغسول ده بيوازن الدهون في البشره يعني مثلا لو بشرتك دهنيه جدا وبتنزل سمنه بتستخدمي غسول للبشره الدهنيه ف بيكون مجهز أنه يقلل الدهون دي …لو بشرتك جافه أو عاديه واستخدمتي غسول للبشره الدهنيه طبعا هيعمل وظيفته ويقلل الدهون ف بشرتك تنشف جدا جدا وتقشر وتبوظ !
مثلا لو بشرتك جافه هتجيبي غسول كريمي وده بيكون في نسبه كريم علشان يرطب وشك ويزود في الدهون …ف لو بشرتك دهنيه هتتدمر لأنك هتزودي الدهون فيها ف هتعمل حبوب ومشاكل
وهكذا …ف لازم لازم نختار بعنايه الغسول المناسب لبشرتنا
يارب اكون قدرت افيدكم واوصل المعلومه بسهوله
