راجــــل بيحبـــك

((**(( راجــــل بيحبـــك ))**))
***************************

** ** ** ** ** ** **
معلش .. متزعليش منى عشان اتأخرت الوقت ده كله من غير ما أكلمك أو أقولك حاجة .. أنا باعتذر وآسف جدا جدا .. متستغربيش انى باعتذر أو باتأسف , مانتى عارفة انى عندى شجاعة الإعتذار .!!. أيوة طبعا الإعتذار محتاج شجاعة وقناعة فى نفس الوقت .. 
هو عيب إن الراجل يعتذر للست .؟؟. مين اللى قال كده .؟. العيب كل العيب اننا نمثل العنجهية والتكبر والغطرسة .. الروجولة شهامة .. والشهامة انى أعرف حدودى وحدود غيرى .. وأعرف حقوقى وحقوق غيرى ..
المهم .. أنا ياسيدتى اتأخرت الكام يوم دول لسببين .. أولهم إنى مش عايز أتقّل عليكى وابقى على رأى المثل ( زى المش ، كل ساعة فى الوش ) معلش هو مثل يمكن انتوا يا أهل البندر متعرفهوش ، لكن احنا كفلاحين عارفينه وحافظينه .. والسبب التانى ماحبش اتوصف انى رغّى او كلامى كتير ..
أنا عندى كلمتين صغيرين .. ياريت تحفظيهم وتحطيهم حلقة فى ودنك ..
حبى نفسك أوى .. أوى أوى كمان .. بس مش أنانية لأ .. حبى نفسك متهينيهاش .. متبهدلهاش .. متستهزيش بيها .. إقنعى نفسك إنك جميلة ، أجمل أنثى على وش الأرض .. وإن ” فينوس ” بتغير منك رغم انها إلهة الجمال .. إن القمر بينكسف منك .. لو شفتى حاجة وحشة فيكى قولى لأ ده المراية هى اللى وحشة .. خليه أما يشوفك يبقى مش قادر يبصلك من جمالك .. وإن عمل فيها جدع وبصلك أوى يدوخ .. يغمن عليه .. أيوة صدقينى ..
أما يندهلك ردى بنعومية ورقة حتى لو كنتى تعبانة ، عارفة ليه .؟. عشان ينكسف على دمه أما يشوفك تعبانة ورغم كده بتردى بزوق .. والعكس صحيح برضه .. لو شفتيه تعبان قوليله سلامتك .. لو زهقان قوليله مالك ياحبيبى .. حسّسيه انه كل حاجة ف حياتك وانك من غيره ولا حاجة ..
على فكرة .. الراجل كمان من غيرك ولا حاجة والله .. ميعرفش يجيب لنفسه كباية مية حتى ..
ماااااااااااعدا أنا والله .. أطبخ واعمل اللالى ولا أجدع ست .. بس برضه ” إنتى النص الحلو ” ..
” الراجل اللى بيحبك”