كتب
الشاعر المتميز… أيمن عبدالحميد
مستمرا في محاولاته للكتابة بالعامية والتي لاتقل روعة عن كتاباته الفصحى
فقال
=======================
خربش بسن القلم
وارسم رتوش خرابيش
دوب فى لون الأمل
رشرش بلون رشاريش
…………………………….
يا بكرة ياللى النهار
كحل عنيك بالضي
زقزق خيوط الخضار
وانقش ربيع فى الحي
يابكرة يالى النهار.
زم ف اديك النور
قوم لم ف المستور
ضيف ريشة فوق الريش
……………………………….
وارسم وطن أمنية ..
كون وطن بنور
هدهد عيون الحور
وابدرها فى التهاميش
يا مجتبى الأوليا
يا منتهى الأحلام
يا روعة الأغنية…….
يا ملتقى الدرواويش …
خطط هواك ف الرؤى ….
واهدى النهار الضى…
وارسم غلابة شقا ….
كون وطن حرافيش …
كون وطن حرافيش ….
…………………………………………
قوم لم شمل الحروف
وارسم ف بنيه
سرب الحمام موصوف .. مسكون بجنيه
سرب الحمام غصنين .. فل ويمامة دار
نامت جفون الولد … على خد غجرية
وإتلمت المشاوير … على كفهم ف مدار
دار الفلك ف السما … فاض الولد أنهار
والبنت مروية
فاوعاك تزم الحروف على جرحهم بالدم
واوعاك تطير حمام المغرمين .. دية
خربش بسن القلم .. خربش بحنية
خربش بحنيه…. خربش بحنيه
……………………………………….
خربش كمان وكمان ..
انقش تفاصيلك
ياسندباد الزمان .
مولود بمنديلك
هدهد ندا الأمنية .
خطط ربا الاحلام
وارسم انام وكلام بيحب تفاصيلك
………………………………………
رشرش كمان وكمان
ما تخافش م الرشاريش
سرسب نهار الحنان
من بين شقوق الشيش
فضفض بريق من ضيا
بيشق عتمة ليل
نقط كدة الأغنية ..
واهتم بالتفاصيل
لسة الوطن امنية
لسة النهار خرابيش
………………………………………….
وارسم ورود بالدم
لون نهار احمر
دم الغلابة قلم ..
بيخط بالأحمر
حنى ف جفون الشهيد
لونها بالاحمر
مجروح يا لون الدما ..
موهوم ندا الحرافيش …………
………………………………………………
خربش بسن القلم
وارسم رتوش خرابيش
خربش بسن القلم
ما تخافش م الخرابيش
ما تخافش م الخرابيش
ما تخافش م الخرابيش
أيمن عبدالحميد
فنان إنسان
