حوار / مي إسماعيل محمد

“لتحصد افضل النتائج , تعلم من الماضي واجتهد فى الحاضر” مقوله من جاكسون براون تنطبق على رفيق رحلتنا اليوم الممثل الطموح مروان مسلم الذي ساركب معه قطار حياته ونتحدث عن محطات قد مرت ومحطات ستمر كيف خطط لها ..

بعد ان ركبت قطاره وستقبلني فيه تحدثنا بصراحه وشفافيه كبيره وكان لقائنا كلاتي :

فى البدايه حدثنا عن نفسك بأستفاضه حتى نقترب منك اكثر ؟

انا مروان مسلم انا دكتور اصلاً وغاوي تمثيل من صغري كنت بمثل فى مسرح المدرسه روايات مثل شكسبير وعلاء الدين فانا طول عمري بحب المسرح بعد كده التحقت بمسرح نادي الصيد بس كنت وقتها فى الكليه بعد كده قررت اخد الموضوع بطريقه احترافيه اكتر فحبيت الموضوع ولاقيت نفسي فيه جداً فقررت اخد ورش تمثيل كانت اول ورشه مع دكتور محمد عبدالهادي استوديو ممثل بعديها بقه احترفت فاشتركت فى فيلم الماجيك وخليج نعمه وبنت من مصر بعد كده جاتلي فرصه اني اشتغل مذيع طبعاً موضوع المذيع ده جه بالصدفه الباحته لكني ماكونتش مقرر خالص وماكنش فى خططتي خالص فبصراحه هما ال طلبوني والحوا عليا اني انزل مع رغده شلهوب ال انا بعتز جداً بصدقتها واحنا من اعز الأصدقاء رغم اننا اول مره نتعرف لما اشتغلنا مع بعض فموضوع المذيع ده كان صدفه انا مش اعلامي ولا دارس اعلام انا انسان طبيعي كنت بتكلم مع الناس على السوشيال ميديا لان طبيعتي بحب اهرج واضحك فادارة البرنامج قررت اني اقدم مع رغده شلهوب فقرة السوشيال ميديا كلها فقدما سوى موسمين من برنامج “كلام فى سرك” على قناة الحياة عملنا حوالي 130 حلقه الموسم الأول كان 80 حلقه والموسم التاني كان 60 حلقه والحمدلله البرنامج نجح جداً وكسر الدنيا على فكرة بعد البرنامج اتعرض عليا برامج تاني بس ماكانيتش عجباني قوي يعني انا معنديش مانع اني اعيد التجربه لو لاقيت حاجه حلوه بس طبعا هدفي الاول التمثيل عشان كده اشتركت برضوا بعد البرنامج ضيف شرف فى بعض المشاهد فطلعت فى لهفه ومؤمون وشركاه وكنت سعيد طبعا انهم كلموني فى مسلسل الفنان الكبير عادل امام بدور مذيع فى المسلسل وعملت بعد كده فيلم مع الفنان احمد رزق اسمه “يجعلوا عامر” فانا واخد خطوات لطيفه وفرحان جدا بيها طبعا دلوقتي اشتركت فى فيلم “بيت ست” على فكره احنا باقلنا سنه ونص بنحضر للخطوه وانا متحمس جدا ليه ويارب خير .

– ماهو برجك الفلكي ؟

انا برج العذراء طبعا انا بقع بين برج العذراء والميزان بس انا اكتر برج العذراء .

– من مثلك الأعلى ؟ ومن ساندك لتمية موهبتك ؟

مثلي الاعلى كذا حد من زمان لدلوقتي يعني مثلا محسن محي الدين فنان مبدع فى ادواره وخصوصا فى افلام يوسف شاهين وطبعا احمد زكي لانه فنانه عنده موهبه جباره واسر ياسين كمان عندوا طاقات غير طبيعيه طبعا انا مش عايز اكبروا لكنه سبقني بخطوات متميزة .. أما مين ساندني لتنمية مواهبي والله السؤال ده صعب لان مافيش حد قوي يمكن اكتر حد وقف جنبي كان الاستاذ سامي العدل الله يرحموا مثلت فيلم من انتاجه وساعدني اني ادخل الوسط الفني لاني كنت داخل الوسط وماليش حد فيه لذلك اقدر اقول انو وقف جانبي بحد كبير .

– حدثنا مرحلة مشاركتك باول مسرحيات بحياتك ؟ وماذا اكتسبت منه ؟

اول مسرحية مش فاكرها حقيقي لاني عملت مسرحيات كتير قوي وانا صغير يمكن وانا كبير شوية كانت فى فريق مسرح النادي وقدمت 4 مسرحيات من الأدب العالمي ويمكن اقرب روايه فيهم كانت مقتبسه من رواية سفينه نوح وانا كنت قايم بدور نوح نفسه فالمسرحيه دي كانت مهمه وفيها قيم كمان عملت مسرحيه بالأنجليزي وكانت بتحكي عن المشاكل ال بتواجه الاجانب لما بيجو مصر وكان فريق العمل والمخرجه اجانب وكانت كوميدي فالمسرح احلى حاجه فعلا وانا حزين انو دلوقتي مش موجود يمكن فى محاولات لعودة المسرح فاتمنى انو يرجع بالشكل ال اتمناه واقرب انواع المسرح هو المسرح التقليدي العادي  على فكره الممثل ال موقفش على مسرحه ناقصوا كتير جدا لان المسرح بيضيف للمثل .

– ماذا تفضل ان تكمل حياتك مذيع , ممثل ام طبيب ؟

اتمنى ممثل بخطوات واضحه باعمال واضحه .. طبعا الطب مهنه فيها كم انسانيه والمذيع كذالك لما بيقدر يقدم حاجه تفيد الناس دي برضو حاجه جميله جدا وكذلك الممثل فانا بحب التمثيل وبحس اني معجون بمية التمثيل .

– فيلم الماجيك من المحطات الهامه حدثنا عن هذه المحطه ؟ وماذا تمثل لك ؟

فيلم الماجيك انا بعتز بيه جدا جدا جدا هو فيلم يمكن بقالوا 8او9 سنين بس لغاية انهارده الفيلم لما بيتعرض الاقي ناس بتكلمني عن دوري يمكن اللوك بتاعي اتغير دلوقتي لكن دوري فى الفيلم علم مع الناس يمكن انا مثلت حاجات قبل الفيلم وحاجات بعده لكن بيفضل فيلم الماجيك الناس فاكراه فاعتقد ان ده نجاح يمكن مجموعه من النقاد اتكلموا عن المشهد بتاعي انو كان اقوى مشهد فدي حاجه انا مبسوط منها جدا واضافت ليا هو فيلم بعتز بيه .

– ماهو الأقرب اليك التليفزيون , السينما أم المسرح ؟ ولماذا ؟

السينما الأول عشان السينما هي ال بتعمل تاريخ وهى ال بتعيش المسرح بعديه لانى بحس اني بلاقي نفسي وبطلع طاقات رهيبه مش بقدر اطلعها فى اي حته تانيه يجيي فى الأخر التليفزيون يمكن انا مش محظوظ فيه لحد دلوقتي يعتي بحس اني معملتش خطوات تذكر قوي فى التليفزيون باستثناء مسلسل مملكة الجبل يمكن دوري فيه مكنش علامه قوي فيه بس انا بحب السينما والمسرح اكتر اتمنى يجيلي دور حلو فى التليفزيون يضيف ليا يعني دلوقتي بدأت الحمدلله انتقي الأدوار ال اقدمها .

– ماهو رايك لمن يسيئون لمهنة التمثيل ؟

هقولهم حرام عليكوا واحب اقول ان كل مهنه فى الدنيا فيها الكويس وفيها الوحش كوني طبيب شوفت اطباء عندهم ضمير وشوفت بلاضمير كل مهنه في الدنيا فيها كده وكده والتمثيل كمان فيها الحلو وفيها الوحش يمكن بس التمثيل مهنه عليها الضوء قوي فللأسف الوحش فيها بيتنشر بسرعه لكن احب اقول للناس افتكروا عظماء الفن احنا بلد تسمى هوليوود الشرق بسبب الفنانين العظماء فى كل المجلات والناس دي ال حببونا فى الفن يمكن ناس كتير عارفه اني بحب عبدالحليم وشاديه يصل للهوس بهم وتاليهم صباح فانا مع الناس ال بتقول ان الفن الرساله حتى لو مش رساله مباشره بس الفن حتى لو بضحك الناس من غير اسفاف دي رساله لو بعمل عمل جاد بيشير لحاجه دي رساله فالفن جميل جدا ومافيهوش اساءه ومافيهوش الصوره ال الناس عندها يمكن فى ناس مما يحتسبون على الفن اسائوا للفنل كن الفن فى حد ذاته جميل جدا

 

– بيت ست من نوعية الأفلام الرعب حدثنا عنه ومالذي شدك للموافقه على هذا الفيلم ؟ وهل ترى انه سيغير راي المنتجين حتى ينتجوا افلام من نوعية الرعب والفانتازيا ؟

فى قصه لطيفه بالبدايه احب اقولها  ان انا واحمد عقل اشتغلنا مع بعض فيلم قصير من حوالى 7سنين وبعدين ماشوفناش بعض طول الفره دي من بعد الفيلم بس متابعين بعض على الفيس بوك بس اشتغلنا فى كذا حاجه سواء هو او انا فتبسط ان بعد السنين دي كلها فكرني لما جيه يعمل اول فيلم ليه وهو ال اتصل بيا وقالى ان فى دور انا شايفك فيه انك انت الواحيد ال تقدر تعملوا فدي كانت حاجه لطيفه .. بيت ست انا كان عندي تخوف فى الأول يمكن كان لمدة 5 دقايق وراح على طول بعد ماقعدت مع احمد عقل وقالي هو ناوي يقولي ايه فوفقت لاني شوفت انو هيعمل حاجه مختلفه يمكن الرعب كان فى تجارب مش ناجحه قوي لكن الرعب فى العالم ناجح فلاقيت المخرج والمنتج للعمل اتفقوا يعملوا الحاجات ال تخلي العمل زي الحاجات ال بتتعمل برا احنا حتى كمصريين بنتفرج على الأفلام الرعب الغربيه وبتبسط بيها فايه المانع ان احنا نعمل فيلم مصري رعب فاتمنى انوا ينجح ويغير رأي المنتجين .. أنا بحب كل ماهو جديد ومش تقليدي هتلاقي دايما كل 10 سنين بيطلع افلام بتبقى هى السائده يعني الثمانينات كانت المخدرات والتسعينات الأرهاب والفتره ال احنا فيها ديى دخلنا فى البلطجه خلاص فانا نفسي ان يبقى فى السينمات متاح كل انواع الافلام لان ده الحلو فى الفن ا نا معنديش اى اعتراض على اي نوع من انواع الفن الحقيقي وحطي تحت الحقيقي دي 100خط يكون فى رعب ودراما وكوميدي والأكشن والفانتازيا وعلى فكرة احنا عندنا علامات فانتازيا مثال ساداتي انساتي لاستاذ محمود عبدالعزيز والحب فى التلاجهلأستاذ و الدتور يحي الفخراني وانا بشوف الأفلام دي ناجحه جدا كمان انا بحب الأفلام ال بتخرج عن التقليدي مثل فيلم من نظرت عين وحلو يكون جميع النوعيات من الأفلام .

– حدثنا عن الفيلم العالمي المسيح والأخرون ؟ وكيف تم اختيارك ؟

انا مش عايز اقول عن اي شئ يخص الدور فى الوقت الحالي بس ال اقدر اقولوا ان الفيلم كان مطلوب الكاستنج بتاعوا لمدة شهرين وناس بالألفات بعتت من جميع انحاء العالم فانا قدمت والحمدلله اتقبلت انا كان نفسي اننا نطلع للعالميه وده شئ بحلم بيه وده املي يعني .. كان استاذ هشام عبدالخالق مخرج الفيلم كاتب على الفيس انهم بيبحثوا عن ادوار ل لفيلم فقدمت زي اي حد وتم اختياري بعد تصفيات كتير قوي فاتمنى اننا نبدأ تصوير قريب .

– كثيرين يحبون ان يعلموا كيف يقضي مروان مسلم يومه ؟

مافيش حاجه معينه يعني انا مازلت بمارس الطب لغايه هذه اللحظة فاتمنى اول مابدأ اخد خطوات ثابته استقل بالتمثيل خالص .. وبروح الجيم كل يوم لاني من الناس الرياضيه ال بتحب الرياضة عمتاً انا طول عمري بركب خيل وبلعب اسكواش ولعبت رياضات كتير من ضمنها التنس 3سنين وكمان بحب السباحه كمان بتفرج على التليفزيون والبرامج والمسلسلات انا متفرج جيد جدا وبحب اهنئ اصحابي واشوف اعمالهم حتى لو حاجه انا مش فيها دي كده باختصار حياتي .

• حدثنا عن اعمالك القادمه ؟

 فى فيلمين كل فيلم فيهم نوع مختلف وجديد على السينما المصريه انا لسه مامضيتش فمش هقدر اقول عليهم حاجه بجانب التحضيرات لفيلم المسيح والأخرون .

وفى نهاية حواري هذا اتقدم بالشكر لهذا الممثل الذي منحني بضع دقائق من وقته واستضافني فى قطار حياته متمنيه تجديد اللقاء هذا عدت مرات اخرى وللأسف حان الوقت لانزل من قطاره ليكمل حياته ويزيد من انجازاته ويحقق طمحاته لندخل قطار شخص اخر فى الحلقات القادمه ..

الى اللقاء مع حبي انا مي اسماعيل .