نصائح وافكار لو عديتي الثلاثين من العمر

نصائح وافكار لو عديتي الثلاثين

بقلم… سماح موصلي

لو عديتي ال 30 و داخله على ال40 او أو50 هأفكر نفسي وإياكي بشوية أفكار مش نصايح محتاجين نعملها فكل حتة حوالينا

• غيري طريقة اكلك، ونوع اكلك، ومواعيد اكلك لان معدل الحرق اختلف عن العشرينات

• اشربي مياه كتير لأنها هتفرق في صحتك ونضارة بشرتك

• اتحركي كتير … جيم، اتمشي، كدة يعني هتفرق معاكي نفسيا جدا

• اعمليلك قايمة فيها المزيكا اللي بتحبيها او الاغاني اللي بتظبط مودك

• اقري … حتى لو ما بتحبيش القراية حاولي… الروايات الحلوة بتعيشي فيها حياة … لو ما كنش شوفي الافلام الحلوة الملهمة واتفرجي عليها

• الصاحب ساحب …ابعدي عن الناس الساحبة للنكد والنفسنة وحرق الدم حاوطي نفسك بناس لطيفة

• ابعدي عن اللي كل دورهم ف حياتك الانتقاد والنصيحة بنية «اصلنا خايفين عليكي، وعارفين مصلحتك.» الكلام داه اصلا عشان عديتي ال 30 يعني عشتي وقابلتي في الدنيا ما يكفي اللي يخليكي تعرفي مصلحتك واللي يريحك … ماتغيريش نفسك عشان ترضي حد

• ماتخليش الدنيا والناس تقتل البنت الصغيرة الحلوة اللي جواكي وتحولها لقرشانة وحيزبون… البنت دي حياتها مهمة جدا جدا لحياتك

• ما تفنيش نفسك ف حد ولا حاجة لا شغل، ولا بيت ولا غيره كله بالعقل التفاني شيء غير صحي …العلاقات المتوازنة صحية لشغلك وبيتك ونفسك

• لو ليكي هواية سيبتيها ارجعي مارسيها حتى لو على الضيق