بسبوسه مقدمه من مطبخ اكلات مني صالح
كتبت سمسمه سعد
بسبوسه مقدمه من مطبخ اكلات مني صالح
المقادير
٣كوب سميد وانا بستعمل خمس نجوم
معلقتين جوز هند حسب الرغبه
٣ارباع كوب سمنه
٣ارباع كوب لبن حليب
كوب سكر خشن
٣معالق عسل جلوكوز او شربات تقيل جدا
ومعلقه طحينه مع معلقه سمنه لدهن الصينيه
…………
الطريقه
اقلب السميد على جوز الهند
اخد اللبن حليب مع السمنه ادفيهم يادوب دافي بس مايكونش ساخن كده البسبوسه تنشف ومفيش علاج تاني
انزل في طبق بالسمنه على اللبن الدافئ وانزل بكوب السكر على الجلوكوز واقلب حوالي ١٠ثواني ويكون في حبيبات من السكر باينه في أيدي اوي وانزل بالسميد واقلب بأطراف صوابعي يادوب السميد يندمج مع السمنه باللبن بس ماعجنش علشان ماتعملش عرق معايا وتنشف مني في الفرن
اجهز صينيه مقاس ٣٠ ادهنها بالسمنه علي الطحينه ولو حابه اني اقلبها اقص بمقاس الصينيه ورقه زبده واثبتها بسمنه وادهن فوق الورقه بسمنه وطحينه وادهنها كويس وبالجوانب
انزل بالخليط فيها واخبطها ٣ الي ٤خبطات علي الرخامه واوزع فوقها اي مكسرات نحبها واسيبها حوالي ربع ساعه
اشغل الفرن على ٢٠٠ ويكون ساخن جدا وادخلها على الرف الوسط حوالي ١٠ دقايق واهدي الفرن على ١٨٠
وهنا اول ماادخلها الفرن اجهز الشربات بتاعي كوب ونص سكر على ٢ونص ميه واوطي عليهم لاني عاوزه الشربات خفيف جدا مش تقيل واول مايغللي اعصر نص ليمونه واسيبه على نار هاديه خالص
ارجع للبسبوسه اول ما الجناب تحمر معايا ابتدي اشغل الشعله واحمر وشها وتخرج من الفرن اسقيها بالشربات الخفيف وهو بيغلي وانزل بشويش عليها وهاتتشرب واحده واحده واسيب شويه لو احتجتهم ازود تاني وده باختباري ليها اني اخد بمعلقه قطعه من الحرف او اني اضغط علي الخفيف بصباعي واعرف كانت محتاجه ولا لا
ولو حابه اقلبها. اسلك الجناب بالسكينه بالراحه واجهز ورقه زبده احطها على وش الصينيه واحط صينيه اكبر من صينيه البسبوسه عليها واقلب الصينيه واخبط على ضهرها براحه هاتنزل معانا وارجع احط طبق التقديم بمقاس صينيه البسبوسه واقلبها تاني والوش هايطلع مساوي وورقه الزبده هنا هاتحمي الوش انه يلزق
المزيد من المشاركات