القرص الطريه مقدمه من شيف هاله احمد

كتبت سمسمه سعد

القرص الطريه

مقدمه من شيف هاله احمد

مده التحضير ساعة

مده الطهي ربع ساعة

المكونات
نصف كيلو دقيق

نصف كيلو دقيق بالكوب المعياري كوب الشاي الزجاج  = 4كوب دقيق
ملعقة صغيرة بيكينج بودر
ذرة ملح
ملعقة كبيرة سكر
ملعقة كبيرة خميرة فورية دريم
كوب لبن  حليب  دافئ ممكن اقل او اكتر على حسب الدقيق  معاكي في دقيق بياخد ودقيق لا
3 ملاعق كبيرة قشطة لبن وممكن نستبدلها بعلبة زبادي

وبتكون النتيجة هايلة جدا برضو وبتكون القرص أطري
ربع كوب لبن دافي ده ندوب فيه السكر والخميرة يتفاعل
نصف كوب سمن بلدي
معلقتين كبيره زيت نلم بيهم العجين لو احتاج
سمسم
ملبن او عجوة للحشو
الطريقة

نحضر بوله او طبق غويط تنزلي فيهم بالدقيق وعليه ذرة الملح والبيكينج بودر ونقلبهم على بعض وبعدين على جمب نجيب ربع كوب اللبن الدافي دافي مش ساخن وننزل بالخميرة والسكر يتفاعلوا لمدة عشر دقايق بعد مايتفاعلوا ننزل بيهم على الدقيق ونقلب وننزل بالقشطة او الزبادي وبعدين نعجن بكوب اللبن ننزل شوية بشوية لحد ماتحسي العجينة لمت معاكي وبقت ملساء وبعدين ننزل بنصف كوب السمن ونعجن كويس جدا هتبقي معاكي عجينة بتلزق شوية صغيرين ده سر من اسرار نجاحها لقتيها بتلزق اكتر لميها بمعلقتين زيت كانت في ايدي ماشاء الله عجينة طرية وملساء اللهم بارك ونغطيها بفوطة نضيفة وعلي  مكان دافي تخمر لمدة ساعة وبعدين نطلعها نشكلها كورات ونحشي بقا ملبن او عجوة زي ماتحبي ونرص في صاج ماشاء الله تخمر معاكي لحد ماتخلصي كمية بتاعتك وبعدين ندهن الوش باللبن بفرشاة ونرش السمسم على الوش وندخلها فرن ساخن على الشبكة الوسط نار من تحت بس لمدة تلت ساعة وتحت الشواية لمدة دقيقتين بس تاخد لون واول ماتخرج بفوطه نضيفة غطيها وهي سخنة عشان تبقي طرية ولما تبرد في علب محكمة الغلق احفظيها فيها  احلي قرص طرية وهشة مع كوب شاي باللبن

والف هنا

رئيس قسم المطبخ أ سمسمه سعد

وأ بطوط احمد