= كتب : ابراهيم مرزوق
= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..
ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( مصطفى زين ) ..
= تحدث مصطفي لـ ( أسرار المشاهير ) فقال : اسمي مصطفي محمد زين الدين واسم الشهرة زين عمري 23 سنة .. خريج تجاره انجليزي وهوايتي المونتاج ..
= بدايتي كانت تحدي بين واحد صاحبي انى اعمل قناة وأجيب 1000 مشترك مع ان ماكنش في دماغي الموضوع وكنت بعمل فيديوهات كده for fun وبعدين اللي شجعني واحد صاحبي تاني كان ماسك لي القناة ولم نتوقع نوصل لحاجة أصلاً ..
= بس انا في الأخر حبيت الموضوع وقررت اني أوصل لدرع اليوتيوب الفضي والحمد لله وصلت له وانا كنت متمسك بحلم وفكر عاوز أوصله للناس والقبول بقي هو اللي ساعد في كده ..
= احلى وقت بيمر عليا هو وقت تصوير الڤيديو بيبقي الوقت ده هو اسعد ساعة في يومي كله .. وكان بيحصل لي مشاكل كتير خصوصاً من الناس اللي كنت بانتقدهم وكانوا بيأخذوا الموضوع شخصي ..
= حدث فى احدى الفيديوهات وانتقدت احد الأشخاص واعتذرت له بشكل ودي عشان هو فهمني حاجة انا ماكنتش فاهمها .. وانا بطبعى مش طالب شهرة انا كده حلو قوي واللي عاوز أوصل له من اليوتيوب اني أفضل أوصل فكرتي للناس مش اكتر ..
= مافيش ڤيديو معين عندي كان سبب لشهرتى كل الفيديوهات معتمدين علي بعض وساعدوا في اني أوصل للرقم اللي انا فيه دلوقتى والحمد لله ..
= انا ابتديت بموبايل سامسونج بسيط جدا وماكنش عندي إضاءة ولا اي حاجة خالص كان سني صغير وماعنديش فلوس أجيب حاجات كتير كانت مع اليوتيوبرز الآخرين واللى ساعدت انهم يطوروا من المحتوي بتاعهم ولسه لحد دلوقتى باصور بالموبايل بتاعي .. الفكرة مش في المعدات الفكرة في انك توصل للناس أزاي وتحاول تحببهم فيك ..
= باقول لكل شخص عنده الموهبة ونفسه يكمل فى طريقه مايهمكش اي أرقام الناس وصلت ليها بسبب ما .. المهم انت تكون شايف نفسك كويس قدام نفسك طور من محتواك وهتوصل للي انت عاوزه أكيد بالاجتهاد المستمر والصبر والإيمان بموهبتك ..