مشاهير اليوتيوب .. احمد سعيد بيرجو

= كتب : ابراهيم مرزوق

 = فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( احمد سعيد بيرجو ) ..

= احمد سعيد شاب عشريني يمتلك كريزما ووجه سينمائي وابتسامة مريحة .. أحبه المتابعين لفيديوهاته الجميلة الهادفة .. فهو يتمتع بالهدوء ويقدم الأسلوب الساخر بشياكة واحترافية ويتحدث ببساطة وتلقائية شديدة فى كل فيديوهاته .. وهو يحترم المشاهد لذلك احترمه الجميع وتابع قناته التى اقتربت على النصف مليون متابع .. ويعتبر احمد سعيد هو الاب الروحي للفيديو الريأكت في مصر ..

= تحدث احمد سعيد لـ ( أسرار المشاهير ) فقال : اسمي احمد سعيد محمود السعيد واسم الشهرة بيرجو .. عمري 22 سنة .. دراستي نظم ومعلومات إدارية .. واعمل سكريبت رايتر لإعلانات الميديا ( بأكتب إعلانات ) .. اهوي حاجات كتيرة زي الكتابة والرسم والتعليق الصوتي بس الهواية اللي بافضلها هى الراب ..

= بدايتي علي اليوتيوب كانت في 2016 كنت باعمل فيديوهات بإنتاج ساعتها كان كبير وكنت باصرف من جيبي الشخصي عليها بأجر كاميرات وإضاءة وفي الاخر الفيديوهات دى اللي كان بيشوفها انا وأصحابي بس .. لحد ما في سنة 2018 لقيت فيديوهات إسفاف بتتشهر وكان الميوزكلي ( التيك توك حالياً ) وأشخاص بتعمل فيديوهات في عربية ويجيبوا بنات معاهم عشان يجيبوا مشاهدات لقيت المحتوي ده بيتشهر جداً ..

= كان اول فيديو لي علي اليوتيوب هو اني فتحت الكاميرا واتفرجت علي الحاجات دي زيي زي اي حد وأديت ردة فعلي وتعليقي علي الإسفاف ده .. ومن هنا جت فكرة الفيديو الريأكت في مصر .. عموماً هو كان منتشر بره مصر وأشهرهم اليوتيوبر ( بيودي باي ) لكن من اوائل الناس اللي نشرت الفيديو الريأكت في مصر هو انا واحمد نجم ومهاب شادي ووهبز لكن للأسف هم مش متفاعلين زي زمان علي اليوتيوب او سابوا النوع ده من الفيديوز بسبب  الناس الجديدة اللي عملت نفس نوع الكونتنت بس بشكل عدواني انهم يطلعوا مش يدونا ردة فعلهم او انتقادهم لا بيطلعوا يشتموا ويعملوا عداوة بينهم وبين الشخص اللي بينتقدوه و ده غلط جداً ومش ده الفيديو ريأكت ..

= اللي شجعني اني ابدأ يوتيوب هما متابعيني علي فيسبوك ووهبز صديقي .. اما اغرب الطلبات اللى متابعيني طلبوها كانوا عايزين اعمل ( ديس تراك ) أغنية علي بتوع التيك توك وبتوع الفلوجات ويوميات ماأعرفش مين ومين علي اليوتيوب وانقد فيهم .. بس يعني لو الإسفاف هينتهي بأغنية ماكنش حد غلب غير كده لو الناس دي اختفت انا هطلع أتكلم عن ايه كده النظام البيئي هيحصل له خلل ..

= أطرف موقف حصل لي وانا باصور ان كنت باسند الكاميرا علي الترابيزة اللي باقعد عليها وكانت كل شوية تتهز وتقع بس بلحقها حتي فيه فيديوهات ظاهر فيها الموضوع ده وماكنتش باشيلها في المونتاج ..

= كل الناس اللي بيطلعوا في فيديوهاتي وبنهزر علي محتواهم كلهم فان ليا منهم احمد حسن لما كنت باطلع انتقد محتواه كان بييجي يكلمني ويشكر في طريقتي لان مش باشتم في فيديوهاتي حتي بتوع التيك توك معظمهم فان ليا بيحبوا فيديوهاتي فلما بيطلعوا معايا في فيديو بيتقبلوا الفكرة وبينزلوا كمان سكرين للفيديو ويعملولي منشن وهما بيضحكوا فانا لم أواجه اي مشاكل والحمد لله مع الناس لان إحنا بنهزر علي حاجة هما عارفين انها مش احسن حاجة علي السوشيال ميديا فمتصالحين مع نفسهم جداً وانا بأحب ده .. وكل الحب والاحترام لأي صانع محتوي او اي حد حتي مشهور بصوره علي السوشيال ميديا .. بس الانتقاد غريزة في الانسان والا كلنا هنكون قطيع يسير في اتجاه واحد ..

= أحلامي اني اكتب إعلانات في شركة كبيرة واني اقدم برنامج في راديو او برنامج ساخر علي قنوات التليفزيون لان متابعينى يستحقوا انهم يشوفوني في إنتاج ضخم هما بدأوا معايا من الصفر وكل نجاح باحققه بيبقى نجاح ليهم وبيفرحوا بده فانا عايز أخليهم فخورين دايما باللي وصلنا له ..

= كان فيديو علي الفيسبوك انتقدت فيه واحد مشهور اسمه احمد حسام عنده مليون متابع واكتر .. طلع استغل حدث إرهابي حدث في مصر وقام عمل فيديو وضع فيه موسيقي حزينة ودافع علي الفيديو إعلان ممول عشان يأثر بالعافية علي الناس ويشيروا الفيديو وقعد يتكلم بشكل باين انه تمثيل لاي حد ذو عقلية متفتحة هيفهم من تعبيراته ومن الموسيقي الحزينة في الفيديو .. طلعت وضحت للمتابعين انه بيتاجر بحزن الناس وبيستغل الحدث ده عشان الناس تشير الفيديو ويتعرف اكتر .. من هنا الفيديو بتاعي انتشر وسط المشاهير حتي أصحابه وزمايله في المجال شيروا الفيديو بتاعي ودخلوا شكروني وشجعوني وكانوا مستغربين ان في حد بيطلع ينتقد بكل جراءة شخص عنده قاعدة جماهيرية من غير ما يخاف من رد فعل جمهوره والفيديو حقق نسبة مشاركة كتيرة وهنا أيقنت ان الناس تحتاج لمحتوي نقدي علي السوشيال ميديا ودي كانت بدايتي وبداية المحتوي ده علي السوشيال ميديا في مصر ..

= جملة ( عاش يا ابطال ) دي اشهر جملة أتعرفت بيها وكنت بارد بيها علي متابعيني عشان بيقولولي علي اي فيديو عاش يا بيرجو كده من تلقاء نفسهم فكان ردي عليهم عاش يا ابطال .. في الفيديوهات ابطال لأنهم وصلوا محتوايا في وقت قياسي علي كل منصات السوشيال ميديا .. ابطال عشان بقالهم سنتين معايا بيدعموني علي اي فيديو بانشره .. ابطال عشان هما اول ناس تفهمت المحتوي الجديد اللي هو انتقاد شخص معروف وان مش اي حد مشهور يكون ماشي صح ..

= كان زمان موجود محتوي شبيه بمحتوايا بس ماكنش انتقاد علي أد ما كان تريقة علي تريندات .. كانوا يتريقوا علي الخليل كوميدي او علي أية مصطفي او علي ناس بتطلع تريند وتختفي لكن ان حد يطلع ينتقد شخص معروف كده ومشهور ومالوش تريند دي كانت مش موجودة قبل ما انا اظهر علي السوشيال ميديا عشان كده متابعيني كانو بيكتبوا لي في الكومنتات ( الاب الروحي للفيديو ريأكت ) ودلوقتي ما شاء الله فيه ناس بتقدم نفس المحتوي اللي بأقدمه بطريقة جميلة وراقية برضه وانا بأشجعهم علي ده لكن في ناس اكتر بيقدموه بطريقة مبتذلة وهما انهم يطلعوا يشتموا وماعندهمش قضية حتي يتكلموا عنها هو كدا صباح الخير انا هاقوم اهزق الشخص الفلاني .. دول انا ضدهم تماماً بس هما بياكلوا عيش برضه ..