مدمعيش يا امايا…

بقلم الشاعرة/إنتصار حسين

. ياامايا مدمعيش
إبنك مات لاجل غيره يعيش
واوعاكي ينحرق قلبك

إوعاكي تتعبيني بدمعك
في الجنة مستنيكي

دي منغيرك جنتي متحلاليش
…
متبكيش ..واحياتي عندك
متبكيش..وقوي قلبك
متتعبنيش..

لاجل خاطرك وخاطر بلادي
تعيش..
فديتكم بروحي.. وروحي قصادكم
متساويش….

مدمعيش..وحياتي عندك مدمعيش
ارتاحت يا امايا
لما شوفت هنايا
في جنة الفردوس

…
يا مايا ..مدمعيش
وبقلبك إدعي للجيش
ينصره ع الخونة اللي
ما تختشيش…

ده دعاكي يا امايا
كان بيقوي قلبي خلاه حديد
ولما أتقبل يا مايا
فديت بلادي وقالوا عني شهيد

…
مدمعيش يا مايا
انا شوفت هنايا
لما وقفوا الحور العين
هناك في الجنة ع الصفين
وملايكة الرحمن رايحين جايين
يكبروا ويهللوا
ويعطروني بالرياحين
وسمعت يا مايا صوت جميل
قوي وحنين وكان دليل

للجنة ادخل ياشهيد
واتنعم فيها بكل جميل
وف حناجر طيور خضر
روحي لاقيتها متعلقة
بطوف في الجنة شمال ويمين
…
مدمعيش يا ام الشهيد
لقانا يا غالية أكيد
لكن…
بعد عُمر ليكي مديد
مدمعيش يا امايا
انا شوفت سعدي وهنايا
….
ودلوقتي سلام …⁦
رايح للجنة قوام….
خليني اكون فيها سعيد
ومتبكيش علية يا ام الشهيد