الكورونا الحلوة؟

بقلم / خالد عبد العزيز
من ايام .. كانت الأيام بتجري زي القطر اللي ما بيقفش واحنا وراه بنجري بأقصى سرعه علشان نلحق ومبنلحقش والوقت كأنه له جناحات وبيطير ، متعلقين في في حبل العمر و حضنينه بايدينا ورجلينا عشان نلحق احلامنا اللي بتصغر ما بتكبرش ، والساقيه اللي مربوطين فيها والطلبات اللي ما بتخلص وفجأه بدون مقدمات …
STOP خليك في البيت والايام بقت ماشيه بالتصوير البطيء .
القطرعطل والحبل قصر.. وحياتي اتغيرت دلوقتي قاعد في البيت وسط حبايبي والدوامه وقفت .. ووقفت قدام مرايتي واجهت نفسي واخطائي ورتبت اوراقي الكورونا الحلوه عملت معايا الصح وعلمت ناس كتير الصح ، مبقاش في فرق بين غني وفقير ولا ناس بتنام من غير غطى وسرير و ناس على الحريرعايشين ، كله بقى للكمامه آسير ، مفيش فرق بين أبيض وأسود ولا دوله عظمى و صغرى .
صحيح انها خطفت من وسطنا ناس غاليه علينا وبقينا خايفين وبكينى كتير.. بس بقينا بنخاف من الموت وعملناله حساب ، بقينا نشكر ربنا .. ويا رب استرها بقينا نقولها مع كل نفس بيطير، والطبيعه ارتاحت من الزحمه والعربيات ودخان المصانع والتلوث حتى الحروب والمشاكل بعد ما كانت في المركز الاول بقت في المركز الاخير والكورونا الحلوه خلتنا نحس ببعض ونخاف علي بعض بعدتنا بس قربت قلوبنا من بعض ، الكورونا الحلوه إبتلاء وهيعدي زي حاجات عدت كتير لازم تكون قوي وماتخافش .. لأن الموت بميعاد لو جيه مابيتأخرش …الكورونا هتعدي اكيد بس لما تعدي ماتنساش درسك … إن ربك هو القادر.. المقتدر.. الحليم.. الرحيم ….