لماذا لم يغني حليم من ألحان فريد الأطرش وما سبب الخلافات بينهم

كتب احمد علي 

تقرير تلفزيوني نادر قام به التلفزيون السوري تناول فيه الخلافات التي كانت بين العندليب الاسمر عبد الحليم حافظ والموسيقار فريد الأطرش بسبب التنافس بينهم كأبناء مهنة واحدة، ولماذا لم يعني عبد الحليم اغاني من تلحين فريد الأطرش.

فريد لا يعرف سبب عدم غناء حليم من ألحانه 

في لقاء تلفزيوني نادر كشف الموسيقار الراحل فريد الأطرش سبب عدم تلحينه أغاني لكوكب الشرق ام كلثوم و للعندليب الاسمر عبد الحليم حافظ،قال فريد ” انا قولت كتير كانت امنيتي الحن للست ام كلثوم وعبد الحليم، و اتفقنا فعلا وعجبته الحاجات اللي سمعها مني و اتجنن ونده ليلتها للصحفيين والمصورين والاذاعات وخدت مننا احاديث، وفي الاخر بتتبخر هذه الاشياء، وابص القيهم بتهربوا ليه مش فاهم، حاجة تعرضها عليكي وتعجبك وأبص معرفش ايه السبب في شئ مش قادر اوصله.

مجدي العروسي :فريد فنان كبير وحليم خبيث 

 

وتعليقا علي كلام فريد الاطرش قال في نفس البرنامج مجدي العمروسي صديق عبد الحليم حافظ ” كان خبيث يقصد حليم، فريد فنان عظيم وملحن عظيم اثري الشرق العربي وتمسك باللحن الشرقي، و انسان كانت ليه قيمته العظيمة في حياته وظهرت اكثر بعد وفاته، وكان ليه جمهور في شمال افريقيا ميسمعش غير فريد الاطرش

 

بليغ حمدي:كانا  علي وشك التعاون في أغنية 

وتعليقا علي كلام فريد الأطرش قال الملحن بليغ حمدي” الاتنين العند من بعض والانا جواهر، يمكن دي أشياء عطلت التعاون بينهم انما كان ممكن تحصل جدا، اعتقد مكنش فيه مبرر يكون بينهم خلاف، لانه ده جيل وجيل وفكر وفكر، ثانيا فريد الأطرش ملحن عظيم وغني ليه اكبر مطربات يعني مش اي حد فريد الأطرش، يعيش خمسين سنة وستين سنة الناس بتسمعه ولحد انهاردا، فانا بالنسبة لي هذا الموضوع تصورت لفترة أنهم قربوا يتعاونوا مع بعض ومعرفش اللي حصل وتراجعوا تاني، حصلت لغبطة مسالتش عنها لاني محبش اعرف تفاصيل بشوف اني مش عايز اعرفها احسن،

مودي الموجي: أغنية نورا لحنها فريد  لحليم 

وكشف مودي الموجي ابن الملحن الراحل محمد الموجي، وقال هو مكنش بيضحك عليه اللي حصل ان فعلا الاستاذ فريد كان بيلحن للاستاذ عبد الحليم، والاستاذ فريد لحن لعبد الحليم اغنية نورا، دي كانت معمولة للاستاذ عبد الحليم، وفعلا كان غناها وتم بينهم لقاءات وجلسات بالموضوع ده وعمل عليه بروفات، بس للاسف الاستاذ فريد جه عمل الفيلم بتاعه، واحتاج الاغنية عشان كانت بتصمم علي رقصة في نفس الفيلم، فريد قال لحليم انا محتاج الاغنية، فخد الاغنية ومتمش اللقاء، ده حصل فعلا واتقال لوالدي من عبد الحليم

وجدي الحكيم : سبب الخلاف بينهم حفل شم النسيم 

وقال الاعلامي وجدي الحكيم انه مكنش فيه تنافس بينهم غير في ليلة عيد الربيع”شم النسيم ” اللي اتنين عايزين يغنوا، انما طول السنة عبد الحليم يغني في ذكري الثورة، ، انما بتيجي الليلة دي يبقي الاتنين عايزين يغنوا فيها، وجت فترة وكان الاستاذ فريد الأطرش نقل اقامته كاملا للبنان، وعبد الحليم كان بينفرد بغناء حفل ليلة شم النسيم، فلما رجع تانى الاستاذ فريد مصر جت تاني الليلة الشهيرة، اللي حصل فيها هذا الصراع، يعني احنا موجهناش الصراع ده إلا في الليلة دي بس، مرة واحدة انه مين فيهم يكون علي الهواء والتلفزيون يتقسم ازاي هذه المشكلة هي الليلة الوحيدة، وحلينا المشكلة دي ان حفل الاستاذ فريد الاطرش يذاع علي القناة الاولي في التلفزيون والاستاذ عبد الحليم يسجل  حفله تلفزيونيا عشان يتذاع تاني يوم وتتذاع وعلي الهواء علي موجات الاذاعة، يعني وده كان الحسم علي ان الاستاذ فريد لظروفه الصحية ممكن ميعملش حفلة بعد كده،انما عبد الحليم قدامه فعشان كده يتم تكريم الاستاذ فريد باذاعة حفلته مباشر علي التلفزيون.