قالوا زمان…شعر : غرام نعيم
قالوا زمان
شعر : غرام نعيم
قالوا زمان
قالوا الصبر أجيبه منين
وإن الكدب مالوش رجلين
ولو ماتشوفش من الغربال
يبقى لزومها أيه العينين
قالوا زمان
قالوا كمان على قد لحافك
لازم تبقى مادد رجليك
وإنك مهما جريت عالرزق
اللي يجيك المكتوب ليك
قالوا زمان
إن القرش الابيض ينفع
يوم ماتزيد الدنيا سواد
وإن العرق ساعات بيمد
لسابع واحد من الأجداد
وبرضه في عين أمه القرد
أجمل وأحلى غزال وده جد
قالوا زمان
ان الدنيا يوم حتدور
وان الظالم بكرة يغور
ويبقى في إيدك العصفور
أحسن من عالشجرة طابور
قالوا زمان
إن الفار راح يجري ويلعب
اما القط خرج من الباب
ومهما إن طال أي غياب
يبقى أكيد فيه له أسباب
قالوا زمان
اللي تشوفه اليوم متمكن
ياما زمان كان ده بيتمسكن
واللي بتحسبه أخ هارون
بيطلع دايما كده فرعون
قالوا زمان
يوم ماتلاقي الميه بتثبت في الغربال
يبقى الواحدة مرة تآمن كده لرجال
واللي ماترباش ياخال
بتربيه أيام وليال
قالوا زمان
اللي يخاف مش حيقول
واللي ماخافش ده اللي يقول
وإن الأزمة مهما تطول
بكرة حييجي ومعاه حلول
المزيد من المشاركات
غرام
