” ما كان لله دام واتصل” تكتبها / دعاء خطاب

” ما كان لله دام واتصل” تكتبها / دعاء خطاب

طيب خليني اقولك إن أي شئ حتعمله
نتيجه لحافز… الخوف والقلق
وأي هدف حتركز عليه للأسباب الغلط
إما إنه مش حيتحقق.. وإن تحقق
مش حينجح… وده كلام “علمي”
على فكره.. وإن اتي ثماره حتبقى وقتيه
ومش حتدوم.. وممكن جدا يكون سبب في تعاسه الشخص وتوتره ومصدر قلقه.
اي شئ سليم يؤتى لذاته… مثال:

* انا بعبد ربنا وبتقرب منه بالطاعات
ليس خوفاً من ناره وعذابه
ولا طمعاً فيما عنده
بل محبه في وجهه الكريم
وإن كل هدفي رضاه.

*انا بشتغل وبتعب مش خوفاً من الفقر
ولا علشان الناس تقول عليا ناجح
لكن لأني عايز اتعلم شئ جديد
أنمي مهاراتي .. نوع من المعرفه
بكتشف نفسي وبحفز قدراتي
كده كده ان شاء الله الفلوس جايه
لكن ماتبقاش هي الهدف.

* انا حتعامل كويس مع الناس
اللي حوليا علشان بس اتقي شرهم
واريح دماغي…وماسمعش كلمه من حد تضايقني ولا تيجي على كرامتي
ابقى قابلني لو ارتحت.
لكن انا بتعامل معاهم كويس علشان
بتقي الله فيهم.. علشان دي فطرتي وشخصيتي.. علشان اخد أجرهم
علشان الكلمه الطيبه صدقه
وتبسمك في وجه أخيك صدقه
علشان الحب في الله.

* أنا بلعب رياضه اصلي خايف امرض
اصلي خايف جسمي يبوظ
اصلي خايف من تعليقات الناس
لو تخنت.. علشان ألفت نظر الناس ليا
مش ممكن حتستمر ومش حتجني
ثمار تعبك..
لكن انا بلعب رياضه علشان احافظ على
صحتي لأن الصحه دي تاج فعلا
لأني عايزه احافظ على امانه الله في
نفسي فبصونها
لأني عايز اشتغل واتحرك في الحياه
وبساعد نفسي بالحفاظ على لياقتي.

* أنا متشدد في تربيه أولادي
ومركز اوووووى في كل كبيره وصغيره
علشان خايف يفلتوا مني… مرعوب اخلاقهم تبوظ… مش عايز اسمع كلمه وحشه من حد عليهم…
خايف الناس تقول فلان معرفش يربى..عايز الناس تشاور عليهم وتقول
ابوهم عرف يربي!!
مش ممكن إلا إن كل اللي خايف منه
حيجي يوم ويتحقق.
لكن انا بربيهم وانا هادي واثق
لأن هدفي انشئهم على طاعه الله
علشان يكونوا سبب دخولي الجنه
علشان دول امانه الله وانا بوفي حق
الأمانه دي.. لأنهم سبب سعاده وفرح
لقلبى.. مش واجب بأديه وانا مرهق
وتعبان من مسؤوليتهم.

* بطيع ربنا فى زوجتي
وبريحها قدر المستطاع
مش علشان انا خايف من زعلها ولا علشان
شكلي أدام الناس .. ولا علشان
محتاج لخدمتها ليا.
لكن لأنه بموجب الميثاق الإلهي
وبكلمه الله… أصبحت أمانه عندي
ذات مكانه خاصه بقلبي
وانا بتقرب لله من خلال صيانه الأمانه
وبتقي الله فيها وبحبها وبحترمها
لأني ابتغي مرضاه الله اولاً وأخيراً.

لو كل شئ بنعمله في حياتنا اتخذ نيه لله
لأني ابتغي الجنه تحت ظل عرشه
لأني اتمني أن اؤدي رسالتي بشكل
جميل وسليم في الحياه
ولأن عيني على رضاه
كل حاجه حتبقى أيسر على النفس
وأخف حمل وأكثر متعه ونجاحها مؤكد.

” ما كان لله دام واتصل
وما كان لغير الله انقطع وانفصل ”

دمتم مطمئنين واثقين بالله.