كل عام وشعب مصر العظيم والأمه الإسلامية بخير وسعادة ونحن نستقبل رمضان على خير بعد أيام بأمر الله ..

للأسف القاهرة زحام لا يطاق فى معظم الأحياء والناس معظمها يردد بسبب قرب رمضان وكل عام وأنتم طيبين …

نعم … نريد أن نستقبل رمضان ونحن طيبين وأن يمن الله علينا بالصحة والعافية فى كل ربوع مصرنا الحبيبة، فلماذا لا يلتزم معظمنا بأساليب الوقاية من الفيروس لماذا الزحام والخروج والمخالطة وليس هنالك ضرورة، لماذا لا يفهم البعض أن الوقاية خير من العلاج وأن الصحة تاج على رؤؤس الأصحاء لا يراه إلا المرضى !

و مع تصريحات وزارة الصحة اليومية ..

رسميا بقينا تقريباً 795 حالة اصابة يومياً وهذا هو المعلن فقط أو ما تم الإبلاغ به من حالات الإصابة.

و طبعاً الآن والفترة القادمة أهم فترة صعبة تمر بها مصر في أزمة كورونا، ومن المحتمل أن نري جميعاً عائلات قريبة مننا فيها مصابين بالكورونا أو حالات، وأكيد لا نريد أن نفقد أحبابنا.

الفيروس انتشاره انفجر خلاص وبقى في كل مكان في مصر.

الناس لازم تفهم خطورة الموقف الحالي واللي عارف يقول للي مش عارف، واللي فاهم يقول للبسيط، وكل واحد يسيطر علي اسرته وعياله، و اللي عنده سلطة ينفذها و يجبر الناس اللي يقدر عليهم إنهم يلتزموا بالسيناريو الهام يا ساده …سيناريو الوعي … !

وهو نفس السيناريو اللي طبق في الصين … نفس السيناريو اللي خلى مقاطعة ووهان اللي كانت هي المنبع انها تحتفل انها خالية من الفيروس وان كانت ظهرت أمراض أخرى هنالك الآن ربنا يبعدها عنا.

الموضوع حسبته بسيطة .

الفيروس مدة احتضانه ١٤ يوم، لو سيطرنا على نفسنا كمجتمع الفترة القادمة ٣ اسابيع اللازمة المنتشرة دلوقتي بشكل كبير .. هتقل .. لان لو كله التزم، المصابين هيبقوا محدودين و يبقي سهل يلاقو رعايه ويخفوا، و اللي بيحافظ على نفسه تبقى مهمته أسهل علشان كل اللي حواليه فاهم و بيتعاون.

دورك دلوقتي انك تختار السيناريو المناسب ليك، ولو ليك اي سلطة أو صوتك مسموع وصل صوتك و عرف اللي حواليك ان المعركة عايزة كل شخص.

لو عندك حد لسه مقتنع ان الموضوع بعيد عنه وانه الموضوع مش مستاهل كل ده او انه بعيد عننا، فهمه أن الكلام ده مش حقيقي.

وأن المستشفيات مليانة وفي صعوبة شديدة أن في حد يلاقي مكان، وأن العزل المنزلي تم تطبيقه لكثرة الحالات وأن الفريق الطبي قرب على مرحلة الانهيار، وأن كل يوم دلوقتي حالتين ثلاثة بنفقدهم من الفرق الطبية وان موقفه السلبي ممكن يتسبب في عدوى لولاده او بيته او زملاءه في الشغل.

احنا دلوقتي في نفس مرحلة الإختيار اللي واجهت كل الدول اللي قبلنا، و مع انه هو نفس الفيروس، لكن كل دولة حصلت فيها حدوتة مختلفة على حسب رد فعل شعبها وهل فهموا ووقفوا مع بعض و قاوموا الجهل و قاوموا الاهمال … ولا لأ !

نعم فى تطعيم الآن ضد (كوفيد-19) ولكن .. !

كلنا دلوقتي عارفين أعراض الكورونا وعارفين نلتزم ازاي وعارفين وحافظين الوقاية الذاتية ازاي ولازم كلنا نساعد بعض ونوعي بعض.

خليكم فاكرين

كنا من شهور بنقول خليك في بيتك

دلوقتي بنقولك #البيت_أو_الموت

خروج فقط عند الضرورة القسوى بكل الاحتياطات المعروفة بحذافيرها والماسك ضرورة .. ضرورية وبدون أى تراخي.

#لتجنب_انفجار_كورونا_في _مصر

ملاحظة هامة الدولة وفرت ٣٢٠ مستشفى تقدم خدمات علاجية لمرضى الكورونا ده غير العزل المنزلي للحالات البسيطة ومازال في مستشفيات كثير ممكن تتحول الى عزل، ولو التزامنا بإذن الله مش هنحتاج مستشفيات تانية تتحول لعزل.

عاد النشاط الرياضى وكثرت الإصابات بكورونا بينهم سواء فى فرق الرياضية الأولى أو بين رياضى معظم الألعاب !

لأن أولادنا حياتنا، ومع كثرة الإصابات بالفيروس .. لماذا لا يتوقف النشاط الرياضى حتى يختفى الوباء ؟

مثلما عادت الحكومة مشكورة لتعطى موظفيها اجازات إستثنائية !

أن يطبق حظر تجوال كامل، والإقامه الجبرية بالمنازل للحفاظ على الأرواح لمدة أسبوعين للسيطرة على الفيروس ومحاربة الوباء فخسارة الأموال أفضل بمراحل من خسارة الأرواح .. !

بدلاً من تغريم من لا يرتدى الماسك غرامة فى المواصلات العامة 50 جنيهاً !

حد يقول لى سبيها لله هى كدا ماشية ببركة ربنا .. أقول طبعا .. ولكن ”إعقلوها وتوكلوا” والوقاية خير 100 مليون مره من العلاج !

يارب إحفظنا وأولادنا وأحبابنا .. يارب احفظ مصر وأهلها ورئيسها وجيشها اللهم آمين آمين آمين.

تحياتي لكل متابعيني فى مصر والعالم ودمتم بخير وسعادة.