اتخليت عنى

محمد زيدان

لاسباب حياتية اقدم اب على الانتحار تاركا طفلة (10 سنوات ) وبعد فترة من الوفاة خرجت الطفلة قاصدة المقابر حاملة بوكية ورد فى يدها وجلست على شاهد القبر وبدات تخاطب روح والدها بما هو اتى :

قبل ما تفارقنى بايام قليلة

سالتنى بعنيك شوية اسئلة

وكان وقتها الصورة مش واضحه

ومكنتش اصلا  فى نظراتك مركزة

طفلة ومشغولة بعروستها والعابها

وفراقك

كان حاجة غير متوقعة

سالتنى بطريقة غير مباشرة

لو سافرت او اختفيت فجاه

 ياترى فى غيابى

 عنيكى

هتفتكرنى باية

مع ان سؤالك كان غلط فى طرحه

والسؤال اللى يتشد ميت خط تحته

هو

 انا من بعدك انا هعمل اية

وادينى جاية النهاردة اجاوبك

عايز تعرف هفتكرك باية

****************

هفتكرك بانك

 سبتنى اواجه زمن … انت مقدرتش تواجهه

سبتنى لمصير مجهول مفيش تعبير

 يترجم وصفه

مصير حرفيا

وجودك كان هيساهم كتير فى منعه

هفتكرك

مع كل ضلمة ليل يهل .. هفتقد فية حضنك

وجودك كان علية رك

كان علية عامل رغم شعورك بقلة حيلتك

كنت اصبر .. كان هيجى يوم اكيد

وربنا فية هينظر فى امرك

*************

هفتكرك بانك

 اتخليت عنى وايديك سابتنى امشى الحياة دى لوحدى بطولى

احارب فيها وتحاربنى

 خلتنى وانا ف ريعان سنى اقوم بادوار ف الحياة

 اكبر مليون مرة منى

اتخليت عنى رغم وعودك لية بانى

من يوم ماجيئى للدنيا

  لا يمكن هتسمح لشىء يالمنى

*****************

عايز تعرف هفتكرك باية

هفتكرك بانك

  بمحض ارادتك خدت فى لحظة ياس قرار

دفعت تمنه حتة منك عايشة حياتها تخطى فى اسوار

دفعت تمنة من طفولتها ومن امانها ومستقبلها

 اللى بقى دلوقتى فى مرمى النار

عارفة ومقدرة ان زمنك صعب

وانت كنت عارف ان زمنى اصعب

واللى خلقهم .. خلق حلولهم .. اكيد مش منهم

اننا للموت نهرب

ولية استعجلت ولية استسهلت

مش جايز ربنا

كان جبر بخاطرنا وطيب

*******************

هفتكرك بانك

 اتخليت عنى وتخليك عنى خلانى اقسى عليك بكلام

عمرة ماكن بيعبرعنى

اتخليت عنى وبتخليك عنى خلتنى اقسى عليك بعتاب

بس انت طبعا حاسس بيا

 واكيد عاذرنى

صدقنى

مع كل نفس بيخرج منى بدعيلك فية بالرحمة

دا مهما كان انا منك

واللى يعذبك يعذبنى

وهتصدقنى

لو قولتلك

 ان انا بتمنى

 احفر قبرك

 بايدى واضمك

بس اللى مانعنى

ان لا دينى يسمحلى  

ولا انت بنفس الشعور هتبادلنى

عرفت انا هفتكرك باية

محمد زيدان