لا اعرفها ولا تعرفني🙃بقلم: رانيا كمال العربى

ساعات كده تلاقي ناس متعرفكش و اول مره تشوف خلقتك و يطلبوا رايك!! علي اساس رايك مهم اوي يعني!!
يعني اكون في محل لبس والاقي واحدة لا اعرفها ولا تعرفني وجايه بتسالني: ايه رايك اخد اللون المشمشي ولا الفحلقي؟
انا محتاره: بصراحه الاتنين اوحش من بعض حاجة تحير
سالتني تاني: قولي رايك بسرعه
_ياستي انا اعرفك؟
_لا
_ قابلتيني قبل كده؟
_عمري
_ باين عليا بعرف اخد قرار؟
_ لا خالص بس مش لاقيه غيرك اخد رايه!!
_ خلاص مش هكسفك خدي الفحلقي
ومره تانيه كنت عند الكوافيره وواحده لااعرفها ولا تعرفني وبتسالني بكل عشم: ايه رايك اصبغ شعري ازرق ولا بنفسجي؟
انا محتاره برضه: وتصبغيه ازرق ليه ياماما!! احنا ناقصين رعب!!
انا رايي تصبغيه اصفر
الست مستغربه: اصفر!! ايه اللون الغريب ده!!

وغالبا الناس دي مبيعرفوش ياخدوا قرار بسرعه وبيحتاجوا ان حد يساعدهم!! وخصوصا لو حد غريب ومش عارفينه هيحسوا بمصداقيه وحياد في رايه !! بس ميعرفوش ان انا اصلا شخصيه متردده يعني ممكن اغير رايي بسرعه في اقل من دقيقه !! وان اوقات من كتر التعب مبعرفش حتى اخد قرار (اكل الكفتة مع عيش ولا مكرونة) !! والقرارات البسيطة دى هى اكتر قرارات بتاخد وقت فى التفكير زى: اروح البحر ولا المول؟ اكل بيتزا ولا شاورمة؟ ابعت رسالة ولا مبعتش؟ اقص شعرى ولا اسيبه؟
لكن فيه قرارات تانيه بتكون مصيرية زى اختيار شريك الحياة واختيار الكلية واختيار الشغل !! ودى رغم انها قرارات مهمة لكن بتكون اسرع قرارات واكثرها تهورا وبنرجع بعدها نقول( هو انا مين اللى زقنى؟؟) وده لان القرارات دى لو فكرت فيه مش هتاخدها طول حياتك والا هيحصلك زى ما حصل للفيلسوف كانط اللى فضل يحب واحدة ولما هيا اللى قررت وطلبت ايده قالها : لازم افكر ده انا فيلسوف و شغلتى التفكير لا مؤاخذه !
وقعد يفكر ٩ سنين وفى الاخر لما خد قرار كانت الهانم اتجوزت وخلفت!! (ده عيب الستات بياخدوا قرارات متسرعة !! ماكنتى صبرتى ٩ سنين كمان انتى مستعجلة على ايه !!) 😀
و المشكلة الاكبر ان اللى بياخد رايك ده بيحسسك بالمسؤلية لانك انت اللى قررت بداله بكل ثقه!! فهو كده بيلبسك فى الحيط يعنى نتيجة القرار العبيط اللى حضرتك خدتوهله فى اقل من دقيقه انت اللى هتدفع تمنه فى الاخر وهيرجع يقولك مش انت اللى قلت لى؟
يخرب بيتك مش انت اللى جيت تاخد رايى!! وانا مالى يالمبى !! 😅
عشان كده مفيش مشكلة اذا خدت قرار لحد متعرفوش لانك مش هتشوف وشه تانى ومش هيجى يحسسك بالذنب لو نتيحة قرارك كانت غلط!!
واخر مره كنت في السوبر ماركت ومحتاره بين نوعين من المكرونه وقلت اسال زي ماكل الناس بتسال!!
ولقيت واحده لا اعرفها ولاتعرفني
وبسالها بكل عشم: انهي مكرونه احسن من فضلك؟
الست برقتلي وقالتلي: انتى مش فكرانى؟؟
قلتلها: لا مش واخده بالى
قالتلى بنفس التبريقة: مش فكرانى ازاى وانتى اللى مجوزانى !! و انتى اللى عرفتينى على جوزى منك لله!!
انا مندهشه : انا يا بنتى؟ وهو حد عاقل يمشى ورايا برضه😁
صحبتى اللى مش فاكراها ولا عارفاها: منك لله ياشيخة منك لله
ومعرفش ليه بعد كلامها ونظراتها لقيت نفسي بجرى بره السوبر ماركت تقولوش مشتركة فى ماراثون الجرى لمحافظة كوم الدكة ، ولقيت الناس كلها عمالين يجروا ورايا
وهما يجروا وانا اجرى
يجروا وانا اجرى
لحد مااتقطع نفسي
وفى الاخر اكتشفت انى من كتر الخضة جريت ونسيت ادفع الحساب ، ومن ساعتها وانا خدت قرار انى مقررش لحد تانى ابدا !! ابدا!!