مباراه نسائيه “جيسىvsرودى”.. للشاعر / محمد زيدان
مباراه نسائيه ( جيسىvsرودى)
الشاعر / محمد زيدان
لو قاعد ف مدرج مشجعين ميس رودى
هتشوف الرجاله ظالمين
هتشوفهم خاينين
هتشوفهم بخلا وعيونهم زايغه
هتشوفهم صوره طبق الاصل … من الشياطين
ولو ف مدرج مشجعين ميس جيسي
هتشوفهم غلابة
هتشوفهم كيوت
هتشوفهم بونبونايه يتحبوا موت
هتشوفهم نسمه محتاجين لضمه
هتشوفهم ملايكة فاردين جناحين
ومابين الاتنين
محتارة الانثى .. تطبق .. افكار مين
كل ما شذت بنت عن القاعده
كل ما سجلت رودى هدف
وكل ما بقت البنت مهاوده
كل ما سجلت جيسى هدف
وكل ما كسرت الست كلام جوزها
كل ما خرجت من غير ماتقوله
كل ماترفض انة يشوف تليفونها
كل ما رودى ارتفع اسكورها
كل ما سقفت الابالسه
وكل ما سمعت الست كلام جوزها
وكل ماخدته على قد فهمه
وكل ماسابت له قيادة بيتها
كل ما جيسى ارتفع اسكورها
كل ما اشتدت بينهم المنافسة
ومابين افكار دى ودى
فىى عقول بتتشكل .. فى افكار بتتطبق
فى بيوت بتنهار وبيوت بتتدمر
ونسيوا الاتنين
ان مفيش مخلوق كامل
مفيش حد مثالى من الجنسين
نسيوا
ان من رابع المستحيلات
تغيرى ف طبع راجل
ومفيش اسهل
من تشكيل دماغ المراهقات … بكلمتين ناعمين
رودى هدفها .. ان الانثى تناطح الراجل
وجيسى هدفها .. الانثى تدلع وتدادى ف الراجل
رودى شايفه .. ان ضفر الانثى يستاهل عشانه تقاتل “وهى محقة “
وجيسى شايفه
ان الست مخلوقه عشان تسعد الراجل
رودى لو تطول وبايدها القرار
هتعلن الحرب على الرجاله
هتعملهم عملية اباده
وجيسى شايفه ان الستات لازم تحتويهم
وان الحياه من غيرهم محاله
والمفروض يتحطوا .. مكان ما بيحطوا .. الكحل ف العين
ومابين الاتنين
الرجاله ماشيين .. مع صعوبات الحياه
هاين عليهم يسبوا للدنيا .. ميت دين
نيجى بقى للجد وباختصار وف جملتين
من حسن حظ الاتنين
انهم ظهروا اعلاميا فى وقت
فية الراجل المصرى بيمر باصعب ظرف
لافاضى يتابع ولا عنده طاقه يرد
وتحت مصرى حط ميت خط
وتحت راجل بدال الخط جر الف
لان مش كل مذكر هو ف الاساس راجل بجد
وارد يكون مذكر بس بطباع .. مثليين
والاتنين
ظهروا فى وقت
فية الرجاله يوميا بتخوض ميت حرب
و نفس الحرب
بتفرضها احيانا الظروف ع الست
والاتنين فى وادى تانى خالص
غرقانيين فى مناقشة بديهيات
ربك وضع لها حد
من يوم ماانزل التلات ديانات
ع الارض
لاعمرهم تطرقوا لمناقشه مشكله حقيقيه بجد
وفشلو فى انهم يحلوا مشكله اجتماعية بجد
وبالكارثه الاجتماعية .. والاخلاقيه.. اللى وصلنالها
مش مدركين
**************************************
*ملحوظه : نظرا للوزن والقافية والجمل الموسيقيه للنص تم حفظ الالقاب والتغاضى عن استخدام الاسماء الحقيقية لكلا من الاعلاميه رضوى الشربينى ( رودى ) والاعلاميه ياسمين عز (جيسى )
محمد زيدان
