كيك العسل الروسيه مقدمه من الشيف دينا
كيك العسل الروسيه
مقدمه من الشيف دينا
الموضوع دا كبير فعلا ومن الكيكات اللي ليها وضعها تحسيها قيمه في نفسها كده ووصفه انهرده تطبيقي للشيف المبدع (مو رضوان) امشوا معايا علي الخطوات بالظبط هتظبط جدا معاكم وتعملوا احلي راشن كيك او كيك العسل الروسيه او الميدوفيك كيك
يلا بقي وركزوا معايا :-
اولا ديسكات الكيك:-(وانا هنا مستعمله مقدار ونصف مقدار)
500جرام دقيق/200جرام سكر/100جرام عسل نحل/180جرام زبده/3بيضات كبار/فانيليا/معلقه صغيره بيكنج صودا
نجيب حله غويطه ونسيح فيها الزبده بعدها ننزل بالسكر والعسل ونبدا في كرملتهم نسيبها لحد مايدوب السكر وتبدأ في الغليان نقلب ونضيف البيكنج صودا هتلاقيها هنا بتفور جامد معانا علشان كده قولنا حله كبيره نتركها شويه لحد ماتغمق شويه معانا نرفعها من علي النار ونقلب باستمرار حتي تهدأ ننزل بالبيض واحده واحده ونقلب باستمرار حتي لايتكتل البيض بعدها نضيف الدقيق علي مراحل ونقلب كويس حتي تلم معانا العجينه ندخلها التلاجه تهدأ خالص وتبرد نطلع نقسمها قطع متساويه هنا انا عامله مقدار ونص طلع معايا 9ديسكات مقاس صنيه 26 نبدا في فرد العجينه بين ورق زبده حتي يسهل فردها ونقطعها بفورما نفس مقاس الصنيه اللي هنحشي فيها طبقات الكيك نقطعها دائره مقاس صنيه 26 ونخبزها في فرن علي درجه حراره 180لمده 7دقائق فقط لكل ديسك ونتركها تبرد تماما.
نيجي بقي لكريمه الحشو وهي عباره عن:-
500مل كريمه خفق
100جرام سكر بودر
150جرام ساور كريم
10جرام فانيليا
نضرب كريمه الخفق والسكر كويس لحد ماتعلي معانا ننزل بالساور كريم والفانيليا ونتركها تبرد قليلا بعدها نجيب صنيه الاتشيز كيك او الفورما اللي هنحشي فيها ونبدأ بوضع طبقه كيك ثم طبقه كريمه مقدار نص كوب كريم تقريبا ونكرر الخطوه دي لحد مانخلص 8طبقات من الكيك ونترك الطبقه ال9دي هنفرمها ونبردها شويه وبعدين نجلسها او نغلفها من الجوانب والوجه ونجيب الطبقه اللي فرمناها ونغطي بيها زي ماانتم شايفين ونسيبها تبرد في التلاجه ويفضل نعملها قبلها بيوم وبالف هنا
رئيس قسم المطبخ ا سمسمه سعد