أسما شريف منير تدافع عن نفسها: مش همشي غلط علشان أرضي الناس

رد قوي من الإعلامية أسما شريف منير على انتقادات زواجها الثالث مؤكدة أن الزواج حرية شخصية والتربية تبدأ باحترام الآخرين لا بهدمهم.

كتبت: ريهام طارق 

في رد ناري يحمل الكثير من الحكمة والوضوح وحريه الاراده، واجهت الإعلامية أسما شريف منير الانتقادات اللاذعة التي طالتها مؤخرًا من عدد من جمهورها بعد إعلانها عن زواجها للمرة الثالثة، مؤكدة أن تجربتها الشخصية قد تلهم غيرها من النساء اللاتي عاشوا نفس معاناتها.

جاء رد أسما شريف منير علي إحدى المتابعات لها علي صفحتها الرسمية علي الانستجرام والتي وجهت لها انتقادًا حادًا وجارح بسبب خبر زواجها قائلة:

“شكرًا على رأيك، رغم الأسلوب غير اللائق فيه، بس خليني أوضحلك كام حاجة يمكن تفيدك وتخفف شوية من الحدة اللي جواكي”.

 

وتابعت أسما موضحة مفهومها للزواج:

“الجواز مش ميثاق غليظ بس، الجواز كمان سكينة ومودة ورحمة، ولو ما توفرتش الحاجات دي، بيبقى من الحكمة إن الإنسان يعيد اختياراته مش يتمادى في الغلط علشان يرضي الناس”.

وأضافت أسما شريف منير:

“أنا ما بررتش إني اتجوزت، أنا شاركت رحلة شخصية يمكن واحدة تانية تستمد منها أمل أو تتعلم منها حاجة، مش معنى إنك إنتي أو غيرك مش شايفين ده مهم، يبقى مش مهم”.

ووجهت أسما رسالة قوية إلى منتقدتها قائلة:

“احترامك للستات اللي ربوا ولادهم لوحدهم شيء يُحترم، لكن استخدامك لتضحياتهم علشان تهيني واحدة تانية اختارت تكمل حياتها بالجواز ده تناقض وقلة عدل، كل ست حرة تختار بطريقتها”.

كما لفتت إلى أن الاحترام لا يعني الصمت:

“فكرتك عن الأدب والاحترام مرتبطة بالصمت والكبت، لكن الحقيقة إن الأدب الحقيقي هو إننا نتكلم من غير ما نجرح، نحترم اختيارات بعض حتى لو مختلفة، وتبطل نحاكم الناس من بلكونة أخلاقنا الشخصية”.

وختمت ردها برسالة تربوية عميقة قائلة:

“أنا ما طلبتش من حضرتك تتابعيني، بس واضح إنك شفتي وفضلتي تتابعي، فالسؤال هنا: هو أنا فعلًا اللي مستفزة ولا فيكي حاجة بتتواجه فجأة قدامي؟ وأخيرًا، لو فعلاً عايزة تربي ولادك على الصح، فاعملي كده بالفعل مش بالكلام، لأن التربية تبدأ باحترام الآخرين مش بهدمهم”.