ملف عصاير رمضان مقدم من : دعاء نصر

ملف عصاير رمضان
مقدم من : دعاء نصر

عصير الليمون بالنعناع المنعش
العصير ده حلو جدا فى الحر ومنعش

الطريقه
قشرى الليمون وشيلى البزر منه وحطى حبات الليمون مع النعناع الطازج وسكر ومايه ونضرب في الخلاط ونصفي العصير وعلي الفريزر

عصير الخوح
المكونات
2 كيلو خوخ
1/2 كيلو سكر
ماء لتغطية الخوخ
الطريقة
نحط الخوخ في حلة مع السكر ونغطيهم بالمايه ونسيبهم يغلوا لمدة 10 دقائق ونهدي النار ونسيبهم 1/2 ساعة علي نار هادية عشان يبقي غليظ القوام لازم ما يبقاش خفيف
ممكن نعمل المشمش كمان بنفس الطريقه
وبعد ما يتسلق هنلاحظ ان المايه غليظه وده المطلوب زي الكومبوت نسيبه يبرد و نقشره وطبعا هنشيل البذرة الداخلية
وبعد ما نشيل القشرة والبذرة الداخلية ونقسمه انصاف هنا ممكن نخزنه في الفريزر زي ما هو كده ووقت الاستعمال يطلع يضرب في الخلاط
او نضربه ونخليه مركز ونعبيه في اكياس لوقت الاستعمال و نزوده مايه وسكر

التمر الهندى بالكركديه
المكونات
كوب تمر هندي
كوب كركديه
سكر حسب الرغبة
2 لتر ماء
الطريقة :
نحط الكركديه علي التمر الهند علي السكر وعليهم المايه في حله وعلي النار ونقلب لحد ما السكر يدوب خالص والخليط ده يغلي غلوة واحدة واسيبه يبرد خالص وادخله التلاجه ليله وتاني يوم اصفيه واعبيه في اكياس وعلي الفريزر لوقت الاستعمال

عصير الدوم
المكونات
كوب دوم مجروش
كوب سكر
لتر مايه
نحط السكر على الدوم في حلة على النار نقلب لحد ما يسيح السكر وننزل عليه الماء ونسيبه يغلي
نطفي النار ونسيبه يبرد و نصفيه ونحطه في اكياس وعلي الفريزر لوقت الاستعمال

عصير قمر الدين
المقادير
ورقة قمر الدين
4 كوب مايه سخنه
4 معالق كبيرة سكر
الطريقة
نقطع ورقة قمر الدين قطع صغيرة.
ونحطها في ماية سخنه وعليها السكر ونقلب ونسيبه يتنقع 4ساعات
ونضربه في الخلاط هيبقا معانا عصير مركز نقسمه علي اكياس وعلي الفريزر ولما نطلعه عشان الاستعمال نحطه في مايه وسكر ونسيله يفك ونقلب ونقدمه سواء مع الخشاف او عصير لوحده

عصير الكركديه الساقع
المكونات
كوب كركديه
لترين مايه
سكر
نغسل اوراق الكركديه
و عليها المايه و على النار يغلي لخمس دقائق
ونسيبه يبرد ونحط عليه السكر حسب الرغبة
ولو عندك حد مريض ضغط بلاش تغليه وانقعيه في المايه 4ساعات وصافيه وظبطي السكروفي اكياس وعلي الفريزر لوقت الاستعمال

عصير الخروب
المقادير
خروب سليم.
ماء.
سكر.

الطريقة
نغسل الخروب و نكسره الي قطع صغيرة ونشيل البذر منه.
نحط عليه مايه فى حلة على النار ونسيبه على النار من ساعة إلى ساعة ونصف يغلى على النار.بدون أى إضافات(لا يضاف السكر إليه لأنه مسكر طبيعى).
ندخله فى الثلاجة يوم كامل.
بعد ما يخرج من الثلاجة .لونه هيختلف
نضربه فى الخلاط لحد ما ينعم خالص.ويصفى بمصفاة .
يضاف إليه سكر كميه قليله حسب الرغبة ويتعبي في اكياس وعلي الفريزر

عصير البرتقال
فرصه انه كتير اليومين دول
2كوب عصير برتقال
2 كوب ماء
1/2كوب سكر
ملعقة كبيرة من بشر البرتقال

الطريقة : ندوب السكر في المايه ثم نضع كل المقادير في
نحط كل المقادير في الخلاط ونضربه كويس جدا ويصفى في ونصبه في مكعبات التلج او اكياس صغيرة علي اد الاستعمال

عصير المانجا
كيلو ونص مانجا
نص كيلو بطاطا
سكر
ماية
الطريقه
نقشر المانجا ونقطعها مكعبات
نقشر البطاطا ونسلقها
بعد البطاطا ما تبرد نحطها علي المانجا والسكر في الخلاط ونضربهم ونعبي في اكياس وعلي الفريزر

عصير الفراوله
كيلو فراوله
كوب سكر
كوب مايه
نضربهم في الخلاط هيبقا عندنا بيوريه فراوله نخزنه في اكياس وعلي الفريزير لوقت الاستعمال ويتزود مايه وسكر وقت الاستعمال

عصيرالموز باللبن
كيلو موز
ربع كوب لبن
ربع كوب سكر
عصير نص ليمونه
نضربهم في الخلاط ونعبي في اكياس ونخرج الهوا وعلي الفريزر
ووقت الاستعمال يطلع يفك ويضاف ليه لبن وسكر ويضرب في الخلاط

السوبيا
كوب سكر بودرة
كوب لبن بودرة
5نقط روح جوز الهند
ربع كوب جوز هند ناعم
الطريقه
نخلطهم كلهم في برطمان ونشيله في المطبخ ووقت الاستعمال ناخد معلقه لكل كوب لبن ونزود السكر براحتنا ونضربه في الخلاط

رئيس قسم المطبخ ا/ جيهان جعفر