مسحراتي … بقلم/ مبروك علوه
مسحراتي بصوتي أنادي
على الحبايب كل يوم
إصحى يا نايم وحد الدايم
جهز سحورك علشان تصوم
إسمعنى حبة شهر المحبة
شهر الكرم مش شهر نوم
إرمى المعاصى صحى ضميرك
وصفى نفسك من الهموم
دا شهر طاعة فيه القناعة
هيفوت عليك كإنه يوم
جدد عزيمتك بنية سليمة
بلاش تخرج منه محروم
دا فيه ليلة مش أي ليلة
بألف شهر إنهض وقوم
طلع زكاتك وأغتنم حياتك
إوعاك في بحر الذنوب تعوم
شهر الإحسان شهر القرآن
إقرأ ورتل زيح الهموم
إذكر حبيبك وخد نصيبك
بالصلاة عليه الحب يدوم
إهزم شيطانك وطهر نفسك
قبل الممات وكون معصوم
وقول يارب ندمان وتايب
وأستعيذ بالله من المذموم