كفتة الارز مقدمة من / دعاء نصر 

مدة التحضير/ 15 دقيقه
مدة الطهي / 20 دقيقه
المقادير
كيلو لحمة جملي مفرومة او كندوز كبيرة
نص كيلو ارز مطحون
حزمة من بقدونس وشبت وكزبرة خضرا
بصلتين كبار
5 فصوص ثوم
ملح وفلفل اسود وبهارات

الطريقة:
نخلط كل المقادير مع اللحمة ونعيد فرمها تاني في الكبة وندخلها التلاجة نص ساعه
وندهن ايدنا زيت و نشكلها صوابع أو دوائر زي ماحنا عايزين و نحمرها في زيت سخن غزير وتتحمر كويس عشان ماتفكش في الصلصة ونخرجها علي مناديل مطبخ تصفي الزيت بتاعها
لو عايزة تفرزيها سيبيها تبرد وشيليها وهي متحمرة في اكياس تلاجه ومعاها الصلصه بتاعتها في كيس تاني

مقادير الصلصة
عصير طماطم
معلقة صلصة
ملعقتين زيت وممكن نحط معاهم ملعقة صغيرة سمنة للريحة والطعم
ملح وفلفل اسمر ورشة سكر
توم مفروم
ماية
الطريقة
نشوح التوم في الزيت ويدوب يبدأ يصفر نضيف عصير الطماطم والصلصة
ونتركها تتسبك ونضيف ماية واول ما تغلي ننزل بالكفتة اللي حمرناها ونسيبها حوالي ربع ساعة لحد ما تستوي
ممكن تقطعى بطاطس مكعبات وتحطيها مع الصلصه بعد ما تتسبك وعليها المايه تغلي والبطاطس تتدخل في السوا ننزل بالكفتة وتتقدم بالف هنا ويفضل ان الكفتة توضع في الصلصة قبل التقديم عشان ما تنفش والف هنا عليكم
رئيس قسم المطبخ أ/ جيهان جعفر