دقيقة حداد ..”محمود المزين”

دقيقة حداد
وكام شارة زعل وسواد
ودمعة عين من الحرقة
بتبكى حنين من الفرقة
وصوت ضحك العدو بيزداد 
وهما يومين وهيعدوا
ونرجع تانى نتكلم
على ماتشاتنا والكورة
ومين راح يكسب الفورة
وننسى أم البطل والواد
يا إخواااااااااااااااااانى
بيان عاجل
بننعى الحادث الغادر
وآسف اصلى ما أعرفش
مين الإرهابى والقاتل
هربى حمام من الزاجل
وأحط شارات ماليها سواد
وتحت الشارة مش فارقة
تلاقى أغانى ولا حداد
ولكن احنا قولنا حداد
فاخوانى بلاش نزعل
مسيرة الحب راح تكمل
ولكن قبل ما هسيبكم
انا فعلا باصبركم
مسيرة حب وبتاع ايه
ودم الحر حل وساد
خلاص باى باى انا همشى
واسف انى ما أعرفش
هوية جيش داخل بلدى
بيقتل جدى والأحفاد