أسرار خفيه للأرض والطبيعة مرتبطة بصحتك وجمالك

أسرار خفيه للأرض والطبيعة مرتبطة بصحتك وجمالك

أسرار خفيه .. فى الصيف إمشى على الأرض بخفة ودلع ومع الإجازات وتواجدنا على البحر، جه الوقت نرجع نلمس الأرض حرفيًا… ونسمح للطبيعة تعالجنا من غير ما نحس!

بقلم: رؤى مصطفى

في زحمة الحياة اليومية، بننسى إن الأرض مش بس مكان بنمشي عليه، دي كمان مصدر شحنات طبيعي لجسمنا. يمكن تكوني سمعتي عن مفهوم “التأريض” أو Earthing، اللي هو ببساطة إنك تلمسي الأرض مباشرة، سواء بالمشي حافية، أو الجلوس على الرمال، أو حتى لمس الشجر والطين. الموضوع مش خيال، ده علم بيدرس ونتائجه أصبحت ملموسة على الصحة الجسدية والنفسية.
وفى خلاف على إنها سنة نبوية ومع ذلك مافيش خلاف على إن التأمل فى الطبيعه عبادة ربانية.

فكرة التأريض قائمة على إن الأرض بتحمل شحنة سالبة، وجسم الإنسان بسبب التلوث والضغوط والحياة الصناعية بيحمل شحنة موجبة زائدة. لما نلمس الأرض، بيحصل توازن كهربي بيننا وبينها، بنشحن طاقتنا ونتخلص من الجهد الزائد اللي بيؤدي لأمراض ومشاكل صحية كتير.

دراسات كتير أثبتت إن التواصل المباشر مع الأرض :

يقلل الالتهابات المزمنة.

يحسن جودة النوم بشكل ملحوظ.

يقلل التوتر والقلق ويحسّن المزاج.

ينظم ضربات القلب ويحسن الدورة الدموية.

يعزز المناعة ويقلل من الشعور بالإجهاد.

يخفف من آلام المفاصل والعضلات، خاصة لو كنتِ بتعاني من مشاكل مزمنة أو إجهاد عضلي.

وده مش محتاج معدات ولا أدوية… كل اللي محتاجاه إنك تخلعي حذائك وتنزلي تمشي حافية على التراب أو النجيلة أو الرمل. 20 دقيقة بس يوميًا ممكن تحدث فرق في جسمك ومزاجك.

ودي فرصتنا في الصيف! البحر، الرحلات، النوادي، والحدائق ، كلها أماكن نقدر نمارس فيها التأريض بشكل ممتع وطبيعي. خدي بالك من الأطفال كمان، لأنهم بيتولدوا بإحساس طبيعي للتواصل مع الطبيعة، وبيستمتعوا بيه فطريًا.

وهنا تيجي كبسولة الڤيتامين بتاعة النهارده:
“كل يوم لمسة من الأرض… تساوي جرعة من الراحة الداخلية!”
دي كبسولة مش بتتباع في الصيدلية، لكنها متوفرة ومجانية، ومتاحة في كل مكان فيه طبيعة.

وما تقلقيش لو انتي ساكنة في مدينة أو مش دايمًا بتقدري تروحي أماكن طبيعية. حتى لمس شجرة، زرع، أو استخدام سجادة تأريض خاصة في البيت ممكن يساعد. الفكرة إنك تفتحي قناة اتصال بين جسمك وبين الطبيعة اللي إحنا جزء منها.

رسالة أخيرة ليكي:
جسمك مش مجرد آلة شغالة طول اليوم… جسمك محتاج يرتاح، يشحن، ويهدى. والتأريض واحد من أبسط الطرق اللي ممكن تعملي بيها ده من غير مجهود ولا تكلفة.

فهل حان الوقت إنك ترجعي تلمسي الأرض… وتسمحي لها تعتني بصحتك وجمالك ؟