البطلة أية أيمن
أية أيمن: تكريمي من الرئيس كان حلم وأتمنى أدخل التاريخ بتحقيق ميدالية بأوليمبياد طوكيو 2020
أية أيمن: أكره كلمة عجز وحققت ما لم يحققه أحد و"تامر حسني" أكبر الداعمين لي
حوار: نسمة عبدالنظير
أحياناً يصبح النقص لدى بعض الأشخاص في جانب معين دافع للنجاح والتميز في عدة جوانب أخرى، وغالباً ما نجد هذا النقص في عقول البعض وليس أجسادهم، نقص الجسد أو إعاقته ليست من معوقات النجاح على الإطلاق، بل أنه يصبح نعمة كبيرة إذا كان هو الدافع لشق سبل الانفراد والتفوق والتميز، عندما تتحول نقطة الضعف إلى مركز قوة لابد أن نعي أنها بمثابة نقطة التحول التي تأخذنا لدروب لم نكن نعرف لها سبيلاً إذا كنا أشخاص عاديين كمن حولنا.
بطلتنا في هذا اللقاء لقبت بفراشة النيل الذهبية … أول سباحة بارالمبية مصرية تحقق ميدالية عالمية… أثبتت نفسها وحققت بصمة خاصة رغم معاناتها من نظرات المجتمع… تعشق تامر حسني وهو أكبر الداعمين لها…ينقصها معسكرات خارجية… ترى في أمها مثلاً أعلى… تتمنى تحقيق ميدالية بارالمبية في طوكيو2020 …إنها آية الله أيمن بطلة السباحة المصرية التي أجرينا معها حوار صحفي يبرز أسرار وخبايا تلك الشخصية الرائعة، فكان الحوار كالتالي:
# حدثينا عن نشأتك وطفولتك
أنا من القاهرة، عندي 18 سنة، اتولدت بعيب خلقي ” شلل نصفي”، عانيت شوية في المدرسة، فصلي كان دايما في أدوار عالية، مكنش حد بيتحمل مسئوليتي في المدرسة، كان أصحابي اللي بيساعدوني أطلع وأنزل كل يوم.
# في أي مرحلة تعليمية؟
دلوقتي أنا في أولى جامعة، بدرس بيزنس ومسرح في الجامعة الأمريكية
# متي بدأتي ممارسة الرياضة ومن شجعك علي السباحة؟
أنا بدأت رياضة في 2006 ، كانت علاج مائي، كنت بسلي نفسي وأنا أصلا بحب الميه، أهلي دايماً واقفين جنبي وبيدعموني وشجعوني أكمل والمدربين في النادي كمان شجعوني أكمل، لحد ما بقيت بشارك في بطولات محلية في 2008.
# متي بدأتي تحقيق البطولات؟
من أول ما شاركت في البطولات المحلية وأنا بحقق المركز الأول، ومن أول ما رجعت بطولة كأس مصر تتعمل تاني في 2010 وأنا بحقق كأس أحسن سباحة لحد النهارده، وفي 2014 بقيت سباحة بروفيشنال بعد ما السباحة الدولية البارالمبية رجعت تاني بعد ما كانت متوقفة من 2002.
# في سن صغير للغاية حققتي ميداليات لم يحققها أحد من قبلك في تاريخ السباحة البارالمبية المصرية، كيف فعلتي ذلك؟
كله بتوفيق ربنا طبعا، وبدعم أهلي، وأنا اشتغلت كتير علي نفسي كنت بتدرب الصبح وبعد الضهر ولياقة ومياه ونظام غذائي ، كان بيطلع عيني حرفيا، لحد ما بقيت أول واحدة في مصر تحقق ميدالية عالمية في تاريخ السباحة المصرية الحمد لله.
# في مقابل ما حققتي هل تحصلين علي الدعم المناسب؟
بالنسبة للدعم المادي هو مش كتير ولكن أحسن من الأول بكتير، ولكن لسه محتاجين سفريات ومعسكرات أكتر واهتمام أكتر عشان نقدر نحقق مراكز متقدمة وميداليات ، أما بالنسبة للدعم المعنوي أنا بقيت معروفة في مجال السباحة في مصر بعد ما حققت ميداليات عالمية ولكن طبعا الكورة هي اللعبة الشعبية الأولي في مصر وأخده كل الاهتمام، محدش اتكلم وقال آية حققت مركز سابع في الأوليمبياد، مفيش حد كان بيكرمني قبل ما الريس كرمني، كل التشجيع والدعم كان من أهلي ومدربيني.
# التكريم من الرئيس السيسي… صفي لنا شعورك؟
تكريمي من الرئيس دا بعد تعب ومجهود كبير وبهدله، مكنش في تكريم قبل كده، أنا أول واحدة خدت وسام الجمهورية في تاريخ السباحة البارالمبية المصرية، دا كان حلم حسيت إني حققت حلم من أحلامي، حسيت بالتقدير وقتها، وكنت مبسوطة جدا.
# من مثلك الأعلى ؟
في الرياضة مفيش، لإني عايزه أوصل لحاجه محدش وصلها قبلي، ولكن في الحياة طبعا أمي، هي دايما جنبي بتشجعني وتعبت معايا كتير.
# هدفك في الحياة..ما هو؟
نفسي أغير نظرة المجتمع لمتحدي الإعاقة، عايزه أحقق حاجه في السباحة محدش حققها قبلي، وفي الحياة العلمية عايزه أكمل دراسة بيزنس وأدرس تمثيل وإخراج إن شاء الله .
# أمنية آية أيمن أن تقابل تامر حسني..لماذا تامر؟
أنا بحب تامر جدا من زمان، قبل ما اسافر الأوليمبياد 2016 اتفاجئت بوالدتي بتقولي ” تامر علي التليفون ” ومن وقتها وأنا بكلمه دايما وبحضر حفلاته، تامر طيب جدا وجدع و من أكبر الداعمين ليا، وجوده في حياتي بيبسطني جدا، دايما بيشجعني ويحمسني إني أكمل.
# أكتر شئ ضايقك في 2018؟
السنة كانت لطيفة بالنسبالي عملت فيها حاجات كتير أوي كان نفسي أعملها، ولكن الحاجة الوحشة اللي فكراها كان فيه حوار صحفي مع جريدة كان المحرر كل سؤال يذكر فيه كلمة “عجز” ، اضايقت جدا جدا، أول مرة حد يقولي كده .
# ضعي لنا مانشيت تتمنين سماعه بعد مشاركتك بأوليمبياد طوكيو2020
نفسي أسمع ” آية أيمن تكتب التاريخ وتحقق أول ميدالية بارالمبية في تاريخ السباحة المصرية ” وإن شاء الله أقدر أحقق ده.
