استيفان روستى واغرب واقعه حدثت له حضر جنازته وتلقى عزاؤه فى نفسه

نوادر من حياة استيفان روستى

كتبت / غادة العليمى

استيفان ابوه نمساوي وامه ايطالية ( لكنه كان مصرى الروح والهوى ) .. ابوه كان سفير للنمسا في مصر وقابل امه في القاهرة واتجوزوا هنا .. سافر التلاتة روما، وهناك الأم اتطلقت ورجعت تعيش في القاهرة.. وسكنت في حي شبرا .. وحي شبرا

كبر استيفان وبدأ يدور علي شغل، سافر اوروبا يدور على اي شغل .. اتعرف هناك علي المخرج المصري محمد كريم فقاله انت ترجع مصر تمثل.. فرجع استيفان لمصر وانضم لفرقة الفنان عزيز عيد ومنها لفرقة الريحانى اللى حقق معها نجوميته وبدأت شهرته منها.

تعرف استيفان براقصة نمساوية .. واحبها كانت بتشتغل في مصر واتعلق بها جدا وحبها جدا جدا .. وفجأة الست دي قررت تسافر مقدرش يعيش من غيرها هنا في مصر … جمع فلوس من كل معارفه عشان يسافر يتجوزها .. ولما وصل النمسا لقي ان الرقاصة دي بتحب أبوه وعايشة معاه قصة حب.. ابوه بقي طرده وقاله ارجع لمصر .

الموضوع دا عمله صدمة عاطفية وفضل قافل ع نفسه ورافض الجواز لفترة طويلة .. واتجوز ست إيطالية قبل الستين بحاجات بسيطة وخلف تؤام وماتوا الاتنين على فترات متباعدة بس كانوا اطفال.. الموضوع دا فضل عامله وجع في دماغه.

استيفان كان ليه قرايب كتير في اسكندرية .. فراح زار قرايبه في اسكندرية وعجبته القعدة هناك، اتاخر هناك وعزل نفسه من غير تليفونات ولا حد يعرف هو فين .. الناس في مصر فكروا انه مات فبلغوا نقابة الممثلين تعمل تأبين ليه .. والراديو ذاع خبر وفاته طول اليوم .. فـ روستي كان قاعد بيسمع الراديو لقي خبر وفاته بيتذاع..

نزل بسرعة القاهرة عشان ينفي الواقعة .. لقي الممثلين كلهم قاعدين في عزاه .. اهي دي حاجة تفرح برضه ( عارف مين اللي اهتم يعزي ومين طلع اي كلام ) خدهم بالحضن والموضوع بقي حديث الصحافة .. واتكتب خبر .. استيفان روستي يتلقي العزاء في نفسه

بعدها بشوية اتعرضله فيلم اخر شقاوة .. وكان قاعد يتفرج عالفيلم مع صحابه .. حس بنغزة في قلبه .. جريوا بيه علي المستشفى لقوا عنده انسداد في شرايين القلب .. وعملوله الاسعافات اللازمة وطلبوا نقله لمنزل قريب عشان المجهود وبعد ساعة فاضت الروح للي خلقها.

مراته الايطالية كانت بتحبه جدا .. لدرجة انها اتجننت حرفيا وفعليا بعد موته .. نقابة الممثلين اتكفلت بفلوس سفرها لاهلها عشان تتعالج برا.

اما اشهر مواقف استيفان روستى لما اسرائيل عرضت عليه مبلغ مالي ضخم وانه يمثل 3 افلام في اسرائيل .. هو رفض  جدا … وقال انا مصري واسرائيل عدوة بلدي تبقي عدوتي.

رحمة الله عليه كان مصرى اكتر من المصريين نفسهم