الدكتورة نيرمين فاروق حسن تكتب: هل فكرت فى السيمفونية الحزينة لما بعد الموت !
Written by: Dr. Nermeen Farouk Hassan
الدكتورة نيرمين فاروق حسن تكتب:
هل فكرت فى السيمفونية الحزينة لما بعد الموت !
High Diploma Islamic Science
High Diploma Sport Injuries
Master’s Sport Physiology
PhD Physical Education
Lecturer in EFA _ EBA, Cairo_Egypt
National Football Commissioner
CAF Commissioner 2016 – 2018
Press Writer in The International Day Newspaper in Egypt and London
هل فكرت فى يوم أن الفترة الزمنية من لحظة موتك لتغسيلك لتكفينك للصلاة عليك لدفنك لن تتجاوز الثلاث أو الأربع ساعات في أغلب الحالات !!
بعد انتهاء الدفن بثلاث أو أربع ساعات بالكتير هيكون كل أحبابك و أهلك بيأكلوا أو بيشربوا أو بيستقبلوا ضيوف أو بيتكلموا في التليفون أو نايمين ! مهما كان عندك ناس بتحبك مش هيقعدوا جنبك بعد الدفن أكتر من نصف ساعة أو ساعة إلا شويه ! وحتى لو زاروك كتير لا هايكونوا شايفين و لا حاسيين باللي أنت فيه !! بيتك اللي بتحبه هايسكنه غيرك و عربيتك اللي بتحبها هايركبها غيرك و لبسك اللي بتحبه هايلبسه غيرك و شغلك اللي بتحبه هايشتغله غيرك و فلوسك اللي بتحبها هايصرفها غيرك !! مفيش حاجة هتنفعك غير محبتك للكل وعيشتك وانت علي الارض مع ربنا، مافيش حاجه هتنفعك غير عطفك علي المسكين وتواضعك. كل الغاليين على قلبك هايسيبوك و يمشوا زي مانت بكل تأكيد سبت الغالين عليك ومشيت وانت لسه علي الارض. غلبان اللي قلبه لسه مليان حقد وغل ونفسناا ! مسكين اللي لسه مابطلش نقل كلام وتوقيع بين الناس وبعضها !!غلبان اللي لسه بيغير من اللي احسن منه وعينه في عيشة ورزق غيره !! مسكين اللي لسه قاعد علي سيرة الناس ولسه بيدور علي المشاكل.
المزيد من المشاركات
مسكين وغلبان اللي لسه بيأذي وبيظلم وبيكسر الخواطر وبيتمادى في الظلم. غلبان اللي لسه فاكر ان السلطه والفلوس كل حاجه و ماشي يستقوي ويدوس علي الضعيف. مسكين اللي قاطع اخوه ولا أخته بدون سبب وبيعادي ابوه وامه واهله. مسكين وغلبان اللي بياكل حقوق غيره من ميراث وبيأكل ولاده من الحرام. غلبان اللي يجي يقولك ” أنت متعرفش أنا مين ” قوله دي نهايتنا كلنا يا غلبان !! مهما تعمر فى الدنيا بكره لابد تموت أنت يا آدم تراب .. والي التراب تعود .. فالماذا يا هذا .. تغل وتحقد وتخطط لتؤذى غيرك لماذا تكون الفهلوه والشطارة والذكاء أن تسرق أموال غيرك، أو تسرق إبتسامتة وراحتة وطمأنينتة، لماذا تظلم وأنت قادر وتتمادى فى الظلم وتنسى قدرة الله عليك ؟لماذا تستمر فى الكلام عن العدل والإحساس الراقى وأنت تعلم تماماً أنك كاذب ؟
لماذا تقطع الأرحام وتجرح أقوالك وأفعالك مشاعر وقلوب غيرك ؟
أنت بكل أسف حى ميت لأنك لا تملك الضمير !
أفيقوا يا ساده وأيقظوا ضمائركم من سباتها العميق لعلكم تصنعون كل جميل لكم ولمن حولكم، وتذكروا دائماً أن الموت قادم قادم لا محالة، وحكمة الله ألا نعلم متى يأتى أجلنا حتى يكون فى كل يوم نعيشة فرصة أخرى لنصنع كل جميل لنا ولمن حولنا يرضى الله ولا يؤذى الناس، اللهم إغفر و إرحم .. وإرزقني وأبوايا وأولادي وأهلى وجميع المسلمين جنتك بغير حساب يا أرحم الراحمين.
دمتم متابعيني فى مصر وحول العالم بخير وسعادة، وتابعوني يومياً على تويتر، وجريدتى أسرار المشاهير، اليوم الدولي وأخبار مصر 24.