هالة الدمراوى تكتب : إحنا كمسئولين .. مش مسئولين !

أرسلت للمسئولين .. جالي المسئولين .. قلتلهم يا مسئولين عايز اعرف من المسئولين عن هذا التدهور !
قالولي إحنا كمسئولين فى مراكز قياديه مش مسئولين !! ”
سطور خالدة من مسرحية (تخاريف) للنجم الكبير محمد صبحي .. والتى مر عليها سنوات طويله ثبت فيها ان التخاريف لم تكن ابدا تخاريف .. و لكنها جد و بحق و حقيق ما يحدث يوميا و نراه بأعيننا كل يوم من خلال المسئول اللي مش مسئول !!!
ظاهرة عجيبه يشتكى منها كل اصحاب البرامج الاجتماعيه المليئة بالمشاكل اليوميه الخطيرة علي الصعيد الصحى و التعليمى و البيئي .. الخ
كلما حاولت الاتصال بمسئول للرد علي اسئلة الحلقه و موضوعها الخطير يقول لك : معلهش بلاش انا !!!
طيب و حضرتك ما قولتش ليه الكلمتين دول حينما تم اختيار عظمتك للوزارة دة او للهيئة دة او لاعتلاء الكرسي دة !
فيضطر البرنامج آسفا الهبوط بسقف الحلقه و استضافة اى حد ليه علاقه بالقضيه و السلام !
فيغضب المشاهد و يتساءل اين المسئولين الكبار اللي بجد … و هكذا !!
مطلوب حل لهذة المسأله الشائكة .. مطلوب إدراك من المسئول ان الموضوع مصيرى للشعب و ان ردة علي أى استفسار ليس إختياريا .. المسئول لا يملك رفاهية “التنفيض” للناس .. لانه مسئول !
اتمنى ان يتواصل اى اعلامى مع الموقع و يفيدنا بدقه عن كل التفاصيل فى حالة رفض اى مسئول الرد علي قضايا الناس !
يا تختار الرد علي كل حاله .. يا تختار الصمت و الاستقاله !
حوادث طرق و إهمال مستشفيات وكوارث مدارس ومعاشات و مرتبات و عشوائيات .. و تيجى تكلم مسئول علشان يرد علي مصائب الناس دة كلها .. يقولك بلاش أنا .. اومال يا بيه يجيبونى أنا !