بط محشى مرته مقدم من إسلام عصفور

مده التحضير نصف ساعة
مده الطهى على حسب الحجم
المكونات
بطه حوالى 3 كيلو
حبه بصل مقطعه أربعه
حبه طماطم مقطعه أربعه
ورق لورى
حبهان
كرفس
ماء سخن لسلق البطه
كمون
فلفل أسمر
ملح
ملعقه صغيره من السبع بهارات
المرته
4 حبات بصل مفروم
كبده مقطعه مكعبات متوسطه
قونصه مقطعه مكعبات صغيره
ملعقه كبيره بهارات
ملعقه صغيره فلفل أسمر
ملح
الطريقه
نغسل البطه بدقيق وملح وليمون وننقعها فى ميه بملح وليمون وخل نصف ساعة ونحضر المرته نضع البصل فى طاسه فيها معلقه زبده وفلفل أسمر والبهارات ونقلب لما يدبل
نضيف القونصه ونقلب 5دقايق ونضيف الكبده ونضيف الملح
ونسيبها 5دقايق ونطفى عليها وتبرد نحشى البطه من جوه وبين الوراك وتحت الجلد ونقفلها بخله وفى حله على النار فيها معلقه زبده نشوح البطه من كل الجوانب لما تاخد لون أحمر نضيف البصل والطماطم وورق لورى وحبهان وكرفس والبهارات ونقلب دقيقتين ونضيف الماء وتكون بتغلى تغطى البطه وتغلى 10دقايق على نار عاليه ونوطى عليها لما تستوى براحتها
عند التحمير ندهن البطه زبده ونرش عليها كمون وفلفل أسمر وندخلها تحت الشوايه تتحمر وممكن ندهنها ملعقه صلصه كمان
وبألف هنا
رئيس قسم المطبخ أ / جيهان جعفر