تغريدة شهيد للشاعره رشا الحسيني

قول للألم ..انا لسه واقف مش هاتهزم …
قول للألم ..إن دموعي قنديل منور على الهرم ..
تهدي الطريق لروح الشهيد… إلى اتحكم على حياته بالعدم ..
قول للألم ..قلبي اتوجع ..عقلي اتصدم ..لكن في روحي ..
ألف مدنه .. ومائة صلاه ..جوايا معبد لم ينهدم ..
قول للألم ….انا رايح أصلي في الجوامع ..في الكنائس ..
انا رايح أصلي وشايل علم ..ودم الشهيد على العلم ..
قول للألم ..الرب واحد ..والقلب واحد …والدم واحد ..
انا الي جوايا وطن ..وانت العطن والي سكن
واحنا الي بندفع التمن …
أرواح تموت …أطفال تموت ..أحلام تموت ..
لكن أفكار خبيثة تفضل عايشه إزاي على مر الزمن !!!
الدين محبه ..الله محبه ..قال الرسول ..قال المسيح
وانا مش هقول غير انك مسخ ذميم وعليك اللعنة في كل دين وكل زمن …
جربت تقرأ في الكتاب ..جربت تسمع أي لحن للمحبه
أو ترنيمة حب عذبه ..ولا بتسمع ايه بالمناسبة !!!!
صوت الرصاص لما حاش في القلب آيه ..كنت بقرا للهدايه !!!!!
جربت ترسم أي صوره ..أو تكتب للتاريخ حكايه !!!
ولا لون الدم ودموع في نهر النيل بتجري ..
هي غايتك ..هي فنك من البداية للنهاية ..
وفي النهايه اكيد هاتعرف أن رب الكل واحد ..
وقلبنا المجروح ده واحد ..لكن احنا في الحقيقه مليون الف ساجد ….جوه المساجد ..جوه المعابد …
هانفضل نصلي لرب القلوب ..رب الشهيد ..رب النوايا الطيبه وعلينا وعليك الله شاهد …وعلينا وعليك الله شاهد …
الشاعره رشا الحسيني
مساعد أمين الشعر العامي بشعبة المبدعين العرب …
الإرهاب لا دين له …..