“عقلك طاقه جباره روضه يشتغل معاك مش ضدك!”
بقلم/دعاء خطاب
من اكتر الحاجات اللى بتمنعك توصل للرضا التام وبالتالي بالك يرتاح هي #الحزن!!
حزنك على نفسك والرثاء لذاتك والبحث الدائم عن المفقود وعدم التركيز على الموجود بالفعل؛ بيفقدك طعم السعاده ولذة الحياة!
“وَلَا تَهِنُوا وَلَا تَحْزَنُوا وَأَنتُمُ الْأَعْلَوْنَ إِن كُنتُم مُّؤْمِنِينَ”
الرضا عن كل شئ بيحصل في حياتك؛ فعلا الوصول ليه شئ مش سهل، بس بردو مش صعب.
بتدريب نفسك على إستشعار النعم اللى فى حياتك والتركيز عليها والشكر علي وجودها والإستمتاع بيها، وعدم الإنسياق وراء أى شعور سلبى بتحسه تجاه نفسك، وعدم الندم على اى شئ فاتك، وعدم التركيز علي الآخرين ومكتسباتهم، وعدم مقارنة نفسك بغيرك؛ بيحصل التوازن ده يوم بعد يوم وبتلاقي إن مشاعرك الغير مريحه بتتبدل لنوع من الهدوء وإستقبال كل شئ بيحصل معاك ببساطه اكتر، وبتعرف يعني إيه تسلم امرك لله، ويعني إيه ترضي عن كل قضائه سبحانه وانت واثق في عدله وحكمته ومطمن إنك عامل اللي عليك وسايب لتقديره امورك كلها.
درب نفسك تدريجياً علي عكس المخاوف والأفكار السلبيه داخل عقلك:
* لا تفكر فيما تخاف منه وتخشاه
فكر فيما تحبه وتطمئن له.
* لا تفكر فيما فقدت وضاع منك
فكر فيما لديك وبين يديك.
* لا تفكر في العوائق والعقبات
فكر في الحلول الآخري والطرق البديله.
* لا تفكر فيمن يكرهونك
فكر فيمن يحبونك ويقدرونك.
“لا تنظر للأشياء من حولك من منظار ضيق مظلم؛ بل املأ عينيك بالنور في الأفق”.
#عقلك_طاقه_جباره
روضه يشتغل معاك مش ضدك
دعاء خطاب
