“فكر بقلبك”
متكونش زى الناس عايشين ومش عايشين!
ويعدى العمر بيك أيام شهور وسنين
وحالك هو حالك شكوى وألم وأنين!
وبتضحك على نفسك تقول:
أصل النعيم بعدين!
ماسكين بقوة فى اللى راح
وحاضرنا ليه سايبين؟
فاكرين وجعنا والجراح
لكن الفرح ناسيين!
وكأن فى العمر اللى فات
أفراحنا بس يومين!
نفتح عيونا الصبح على بالنا مختلفين
نلاقى فجأة مشاعر سانين لنا السكاكين!
مبقاش يفرق معانا السبت عن حد ولا اتنين
أجسامنا جوه الصورة ضحكاتنا أهم عاليين
طيب وليه أرواحنا غايبين ومش حاضرين؟
علشان اتعودت على حاضر وتربيع الإيدين
وكده انت شاطر ومحبوب
كده احنا متربيين..
أهم شئ الطاعة والسكوت خليكوا مؤدبين
لحد الروح مانزفت وبان علينا اللى كنا مخبيين
آن الأوان تسمع بقا صوتك
تصرخ وتتحرر من غبا سكوتك
سيبك من الأنا واسبح فى ملكوتك
ده انت الخليفة والدنيا كلها بيوتك
عيش فى النعيم فى حياتك قبل موتك
قرر تودع غربتك قبل القطر مايفوتك
وخلى لوحاتك وصورك تكون مفأجاة للجميع
نقى من النسخ الكتيرة حاجة من الذوق الرفيع
واشترى جنة حياتك وأى حاجة غيرها بيع
وعيش لربك ثم ذاتك يوصل شعاعك للجميع
ده كل حاجة وعكسها بينها دايماً خيط رفيع
خلى قلبك هو الدليل واستحالة فى يوم تضيع
إنت فاكر ان نورك جوا عقلك؟!!
لامستحيل
حتى انت استفت قلبك
نور طريقك واملا الكون بحبك
كتر عطاياك تفرح بهدايا ربك
وخليك إنت أول حد حبك
وثق انك فريد ومفيش حد أدك
وأقولك عالخلاصه..
ريح دماغك وفكر بقلبك.
ولاء محمد عبد العزيز
