الشياكة في زمن تقاس فيه بالماركات إثبتي إن الرُقي بالكلمة والنظرة والموقف
كتبت / داليا حسام
الشياكة مش لون فستان، ولا شكل تسريحة، ولا حتى ماركة شنطة، والشياكة الحقيقية بتبدأ من جوا من طريقتك، من كلامك، من لمعة عينيك لما تتعاملي بذوق واحترام.
فيه ناس تلبس أغلى اللبس، بس لما تتكلم أو تتصرف، تفقد كل الشياكة اللي حاولت تبنيها،وفيه ناس بسيطة جدًا، بس حضورهم راقٍ يخلي المكان ينور أول ما يدخلوا لأن الشياكة عمرها ما كانت في الفلوس، دي كانت دايمًا في التربية والرُقي.
الشياكة إنك تعرفي إمتى تتكلمي، وإمتى تسكتي، إنك تختاري كلامك قبل ما يخرج من بُقّك، زي ما بتختاري لبسك قبل ما تخرجي من بيتك.
الصوت العالي مش جرأة، والرد القاسي مش قوة، الشياكة في إنك تردي بأدب حتى لو اللي قدامك غلط في حقك، في إنك تمشي بخطوة واثقة، مش متعالية، وفي إنك تسيبي بصمة طيبة بعد كل مقابلة، مش أثر كلمة وجعت.
الشياكة كمان في تعاملاتك
لما تقولي “من فضلك” و”شكرًا”، و”لو سمحتي”، حتى مع الناس اللي مش متعودة على الكلام الجميل ده.
لما متتأخريش على ميعادك، ولما تحترمي الوقت والمجهود اللي غيرك بذله عشانك، لما تحافظي على خصوصيتك، ومتكلميش في اللي يخص غيرك، لما تمشي وسط الناس بنعومة مش بتباهٍ، وباحترام مش بتصنّع، والشياكة في السكوت عن الغلط مش التطبيل ليه، وفي إنك متدخليش نفسك في سيرة حد، لأن ده مش بس “قلة ذوق” ده كمان غلط في حق ديننا وأخلاقنا.
ربنا وصانا نغض البصر عن عيوب الناس ونشوف دايمًا الخير فيهم، ولما نعمل كده، بنبقى مش بس راقين إحنا بنبقى حقيقيين.
فيه شياكة في المشاعر كمان.
في إنك متحرقيش غيرك بغيرة أو حقد، وفي إنك تفرحي من قلبك لنجاح الناس، حتى لو لسه حلمك مجاش. في إنك تمدي إيدك تساعدي، وتسيبي الكلمة الطيبة قبل ما تمشي.
عارفة .. الشياكة مش بس إنك تعرفي تختاري لبسك المناسب لكل مكان، لكن إنك تعرفي تختاري تصرفك المناسب لكل موقف، وفيه لبس غالي بيتلبس غلط، وفيه كلمة بسيطة بتفتح باب القلوب، وصدقيني، لو لبسك شيك بس قلبك مش نضيف، الشياكة هتتطفي من أول كلمة.
الشياكة كمان في الحركة، في هدوءك، في طريقة قعدتك، في نظرتك اللي فيها احترام مش فضول، وفي مشيتك اللي فيها ثقة مش غرور، وفي إنك تبقي أنيقة من غير ما تبقي “متصنعة”، قوية من غير ما تبقي “خشنة”.
الست الشيك مش بس اللي تهتم بنفسها، لكن اللي تعرف إمتى تعتذر، وإزاي تسامح، وإزاي تحافظ على كرامتها من غير ما تجرح حد.
وفي النهاية، الشياكة مش موضة، دي روح، دي مبدأ، دي تربية، ممكن تشتري لبس غالي، بس عمرِك ما هتشتري ذوق. وتقلدي ستايل، بس مش هتعرفي تقلدي طيبة القلب أو رقة التعامل.
خلي شياكتك تمتد لروحك، لكلامك، لنظرتك، لرد فعلك، خلي الناس تحس إنك مختلفة مش بس في لبسك، لكن في وجودك كله، لأن الجمال ممكن يجذب العيون، لكن الرُقي هو اللي يكسب القلوب.
الشياكة مش بنتعلمها من مجلات الموضة
الشياكة بنتعلّمها من القلب، من احترامنا لنفسنا وللناس، كوني شيك في كلامك قبل لبسك، في طريقتك قبل مظهرك، وفي نيتك قبل كل حاجة، وخليكي دايمًا متأكدة إن الذوق والاحترام بيخلّوا أجمل فستان يزيد جمال، لأن الشياكة مش لحظة في المراية، دي سلوك بيعيش معاكي طول العمر.
