إعداد وحوار ريهام طارق
ساعات قليلة ونودع 2025 ، ونودع معاها ذكريات كتير عشناها منها حب تولد ونهاية كتبت.. عشنا فيها ايام مليانه فرح و سهرنا ليالي كانت كلها حزن ودموع، واجهنا فيها لحظات انكسار، حسينا بلحظات قوة وتحدي، اتخدعنا من اكتر ناس وثقنا فيهم، وربنا عوضنا بعدها بأشخاص قدمت لنا الامان والاحتواء، فارقنا فيها اغلي الناس، ودخلوا حياتنا ناس غيرهم حياتنا و أصبحوا اعز الناس.
خلصت 2025، خلاص، وسابت ذكريات ارتبطت كل واحده فيهم بأغنية كانت شاهدة على تفاصيل حكايتها.. أغاني كانت محطات استثنائية، تركت أثراً خاص في المشهد الموسيقي العربي، وصنعت مسارات جديدة لفنانين استطاعوا الجمع بين الرؤية الفنية الحديثة والمختلفة والنجاح الجماهيري أيضا.
وهنا من خلال حوارنا مع الإعلامي الكبير محمد حلمي البلك نسلط الضوء على أهم عناوين الأغاني التي تصدرت المشهد الموسيقي في 2025، وفرضت نفسها بقوة.
في البداية نرحب بـ الإعلامي الكبير محمد حلمي البلك في جريدة أسرار المشاهير ونشكره على إتاحة الفرصة لإجراء هذا الحوار:
تقول لمين في نهاية 2025 .. “ياريتك حلوة”؟
للدنيا.
تقول لمين.. “معايا” في 2026؟
لكل واحد حبني من قلبه .
احتاجت تزور.. “دكتور” نفساني في 2025؟
فكرت لكن ربنا ستر.
تبعت لمين رسالة في نهاية 2025 وتقوله.. “أنت تبيعني”؟
لحد كنت فاكره صاحبي لكن طلع بوشين.
تقول لمين في بداية 2026 .. “متخذلنيش”؟
اقول لنفسي خليك قوي و متخذلنيش.
إمتى قلت في 2025 بصوت عالي.. “خطفوني”؟
اقولها لمشاغل الحياة لما اكتشفت انها خطفت عمري.
مين.. “ بابا” المجال في التلفزيون المصري في 2025؟
المذيع اللي فاهم المهنة و مسؤوليتها.
تقول لمين في نهاية 2025.. “أنا اللي مشيت”؟
لأي مكان ما قدّرش وجودي.
مين في حياتك شايفها.. “سلطانة” في 2025 و2026 لحد نهاية العمر؟
زوجتي الحبيبه اللي ساندتني بدون مقابل.
تقول لمين في نهاية 2025 كان.. “ليك وحشة”؟
لناس في حياتي و غابت عني فجأة.
إمتى تعبت في 2025 وقلت ده .. “هد حيل”؟
في لحظة حسيت ان الشاطر مالوش مكان ومش بيتقدر.
حاجات افتقدناها في.. “ملامحنا” في 2025 نرجعها في 2026؟
الهدوء و الابتسامة.
تقول.. “آسف لمين”.. في 2025؟”
لكل حد زعلته من غير قصد .
تقول لمين في بداية ..2026.. “ماليش غيرك”؟
أولادي واخواتي.
تقولها لمين في نهاية 2026..”كيف عملت هيك”؟
أقول كده للدنيا.
مين في 2025 .. “كله قالك اشمعنا هو”؟
اختياراتي.
تقول لمين مش شايف غيرك.. “ملكة جمال الكون” في 2026؟
أمي الله يرحمها.
وأنت بتبتدي 2026 تقول لمين..” وينك من زمان”؟
راحة البال.
ذكرى ليك في 2025 كانت.. “حاجة غير”؟
شغل عملته فرحني جدآ في 2025.
مين..” رقم واحد” في حياتك في 2026؟
ربنا سبحانه وتعالى.
تقول لمين في نهاية 2025 عارف إنك..” مفتقدني”؟
هقولها لنفسي .
تقول لمين في نهاية 2025.. “اترحمت من آذاك”؟
لواحد عارف نفسه .
تقول لمين.. “صاحبي يا صاحبي” وانت معايا في 2026؟
كل واحد وقف معايا وقت الشدة.
فنان ودعنا في 2025 وبتقوله.. “فعلاً مبيتنسيش“؟
سليمان عيد.
تقول لمين.. “انت حبيبي وابن حبيبي” في بداية 2026؟
أيمن صاحبي.
لو تم دعوتك لحضور.. “حفلة تنكرية” هتلبس شخصية مين من الأبيض والأسود؟
عمر الشريف.
مين كان.. “ضل حيطة” في حياتك في 2025؟
واحد كان معايا بالكلام وفي الجد اختفى .
كام مرة اتقال لك.. “ اهدي” وانت بتشتغل في 2025؟
كتير.
تقول لمين كل كلامك كان ..“كلام فارغ” في 2025؟
لأي حد مش فاهم و بيتكلم كأنه أستاذ.
شخص لو سألوك عليه في 2026 هتقول.. “معرفش حد بالاسم ده”؟
واحد ضرني و بعدت عنه.
تقول لمين في بداية .. 2026.. “تيجي نرجع”؟
اقول كده لحلم قديم.
تقول لمين .. “تيجي نحارب” في 2026؟
لنفسي.
تقول لمين..” قبلت التحدي” في 2026؟
للحياة.
بتقول لمين..” بتمنى أنساك” وانت بتقفل 2025؟
أنا بنسى الأذى بسرعة الحمدلله.
تقول لمين.. “بدي أقول بحبك” وانت بتستقبل 2026؟
للسيده بيلا حماتي .
شخص زعل منك في 2025 بتقوله.. “sorry“ صافيه لبن قبل 2026؟
اللي يستاهل الاعتذار أكيد هقوله sorry.
ناس اتعاملت معاهم في 2025 وكانوا أيقونة.. “الذوق العالي“؟
أصدقاء عايشين بره مصر لكنهم قريبين مني جدآ.
“لو لينا عمر”.. حلم نفسك تحققه في 2026؟”
استضافة فخامة الرئيس عبد الفتاح السيسي في حوار خاص
في نهاية الحوار نشكر الإعلامي القدير محمد حلمي البلك على هذا الحوار الأكثر من رائع على وعد بحوار آخر مع نجم جديد ونجاحات جديدة مع ريهام طارق.
نبذة عن الكاتب:
ريهام طارق صحافية مصرية من أصول لبنانية، متخصصة في الأخبار الفنية والثقافية، أجرت حوارات صحفية مع نخبة من أبرز نجوم الفن في الوطن العربي، وتشغل حاليًا منصب مساعد رئيس التحرير ورئيس قسم الفن بمؤسسة [اليوم للإعلام] التابعة للهيئة الوطنية للإعلام، والتي تضم عددًا من الإصدارات الصحفية، من بينها جريدة أسرار المشاهير، اليوم الدولي، أخبار مصر 24، وجريدة تريندات العالم في جمهورية مصر العربية.
انطلقت مسيرتها المهنية من المملكة العربية السعودية،عبر جريدة [إبداع] في الرياض، قبل أن تنتقل للعمل في عدد من المؤسسات الإعلامية الكبرى في الوطن العربي، من بينها جريدة [الثائر] وجريدة [المغرّد] في لبنان، وجريدة [النهار] في المغرب، ومجلة [النهار] في العراق، ومجلة [المحور] في الكويت.
كتبت ريهام طارق عددًا من المقالات التحليلية المتخصصة في مجالات السياسة الدولية وأسواق المال الأمريكية والأوروبية، كما شغلت عضوية اللجنة الإعلامية للمهرجان القومي للمسرح المصري، وتعمل حاليًا على تقديم محاضرات متخصصة في الصحافة بمدينة مسقط سلطنة عمان.