مشاهير اليوتيوب .. بسام وإسماعيل الخشن

= كتب : ابراهيم مرزوق

 = فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجمان ( بسام وإسماعيل ) ..

= بسام وإسماعيل الخشن شقيقان توأم يتميزان بخفة الظل إلي ابعد الحدود .. يتحدثان ببساطة وتلقائية شديدة فدخلوا القلوب سريعاً .. اشتهروا علي اليوتيوب من خلال قناتهما ( شاي بلبن ) .. وقناتهما اقتربت من 200 الف متابع قدموا فيها العديد من الفيديوهات والتحديات المتنوعة والضاحكة واستطاعوا في وقت قياسي ان يمدوا جسور المحبة بينهما وبين المتابعين بما يمتلكوه من قبول لدي كل من شاهدهما .

= تحدث بسام وإسماعيل الخشن لـ ( أسرار المشاهير ) فقالوا : احنا فريق من 4 أشخاص : نانسي وفريدة الخشن وبسام وإسماعيل توأم عايشين في بلدين غير بعض بسام في النرويج وإسماعيل في دبي .. عندنا 35 سنة وإحنا الاتنين بنشتغل نفس الشغلانة مصممين تطبيقات موبايل وويب سايتس .. إسماعيل هوايته لعب الجولف وبسام هوايته السفر والموسيقى ..

= الناس هي صاحبة فكرة قناة ( شاي بلبن ) كنا جربنا مرة نعمل حلقة مع بعض لما بسام كان في دبي وعجبت الناس ووقتها ناس كتير اقترحت في التعليقات إننا نعمل قناة مع بعض .. المحتوى قد يبدو انه تافه للبعض لكن احنا شايفين انه محتوى هدفه التسلية والترفيه تشوفه بعد يوم متعب وشاق .. يمكن يفرق معاك ويخليك مبسوط ولو لمدة الفيديو .. وفعلاً ده اللي بنشوفه في تعليقات الناس لما بيقولوا ان الفيديو ده غير مودهم وخلاهم مبسوطين ودي اكتر حاجة بتسعدنا ..

= بسام بدأ في اليويتوب سنة 2017 عمل قناة اسمها ( بيسوهات ) وكان محتواها متنوع لحد ما استقر على فكرة السفر لانه حاجة بيحبها والناس بتحبها وعجبت المتابعين ولاقت قبول عند الناس .. لكن إسماعيل بدأ في 2019 لما عمل قناة لتعليم التصميم وتجربة المستخدم للعرب ..

= الناس هي اللي شجعتنا بصراحة لولا الناس اللي بتتفرج علينا وبتكتب لنا تعليقاتها ماكناش هنكمل وبصراحة ماكناش متوقعين النجاح ده لكن في نفس الوقت طمعانين في شوية نجاح كمان .. وبصراحة مافيش خطوط معينة بس احنا بنحاول ان كل حلقة نبسط الناس ونعملها احسن من اللي قبلها ونطور من نفسنا عشان الناس تستحق محتوى أفضل ..

= اغرب طلب وصعب جداً نعمله هو إننا نعمل تحديات اكل فيها كميات اكل كبيرة جداً وده صعب جداً نقدمه لاننا ضد اننا نعمل حاجة مؤذية عشان نجيب مشاهدات اكتر .. ومن المواقف اللى صدفتنا اننا في حلقة بعد ما صورناها اكتشفنا إنها ماتصورتش اصلاً بس للأسف ماصورناش نفس التحدي تاني عشان المصداقية لاننا مش بنكون عارفين الإجابات قبل الحلقة .. ولحد دلوقتي مافيش مواقف صعبة الحمد الله بسبب فيديوهاتنا ونتمنى انه مايكونش فيه مواقف صعبة تحصل لنا ..

= فيه سلسلة بنصورها كل فترة اسمها شاي بالنعناع .. الفواصل اللي بين المشاهد بتكون مجموعة من ورق النعناع وفي وسط أوراق النعناع فيه فجوات عادي يعني .. المهم فيه بنت بعتت لنا وقالت انها عندها فوبيا الثقوب ( trypophobia ) وانها بتتضايق لما بتشوق الفجوات دي .. بصراحة احنا كنا اول مرة نسمع عن الموضوع ده وفعلاً اعتذرنا لها وحذفنا الفواصل دي تماماً ..

= مافيش حدود بصراحة لأحلامنا احنا بنحاول نعمل أقصى حاجة نقدر عليها عشان الناس تكون مبسوطة واحنا كمان مبسوطين وفعلاً مافكرناش في موضوع التمثيل او الإعلانات خالص مش عارفين الموهبة عندنا أصلاً او لا .. وحلمنا الكبير اننا نكون سبب في إسعاد ناس اكتر بتتفرج علينا وده اللي بنحاول نعمله كل يوم ..

= تحديات النكت هي اكتر تحديات حاسين انها بتوصل للناس او شهرتنا اكتر .. بس احنا بصراحة مش عايزين نعتمد عليها دايماً وعايزين نقدم حاجات جديدة ومتنوعة ..

= اكتر حاجة كمان بتحسسنا اننا على الطريق الصح لما حد يقول لنا انه بيتفرج علينا مع أسرته او أصحابه او أولاده او لما حد يكرر جملة قولناها او أفيه زي ( لف الويل واركب الدرفيل ) أو لما حد يقلد نانسي الخشن او يقلد إسماعيل في المقدمة بتاعتنا .. وفي النهاية بنتمنى دايماً نكون عند حسن ظن القراء والمشاهدين ..