مشاهير اليوتيوب .. محمد عيسي
= كتب : ابراهيم مرزوق
= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..
ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( محمد عيسي ) ..
= تحدث عيسي لـ ( أسرار المشاهير ) فقال : اسمي محمد فوزي واسم الشهرة ( عيسي ) او محمد عيسي .. عمري 24 سنة .. خريج كلية للغة العربية قسم حضارة جامعة الازهر .. حالياً شغلي كله هو اليوتيوب فقط وكنت شغال قبل كده ولكن تفرغت لليوتيوب حتي انتهي من الجيش بأذن الله .. الهويات المحببة لي هي الكتونولوجيا عموماً وبأحب جداً ابتكر كل مرة فى الفيديو بتاعى من خلال اضافة تأثير وتطوير الأداء وكمان مدمن لعبة بباجي بالإضافة للكورة .. والمحتوي الخاص بقناتي هو عبارة عن مجموعة من الأعمال باعمل محتوي خاص اسمه السبت الممتاز وده باختار موضوع وباتكلم عنه بالتفاصيل والمعلومات العامة اما باقي الايام باتكلم عن التريندات وبنحاول نكون ايجابيين في وسط الغوغاء اللى عايشين فيها على النت وكمية الأخطاء اللي موجودة دي بنحاول نحد منها على قدر المستطاع اما فى رمضان باتكلم عن مسلسلات وبرامج رمضان ..
= انا أبديت علي اليوتيوب من 2014 ويمكن قبلها كمان عملت قناة ولكن ماكنتش باتكلم فيها بنفسي وكنت بانشر عن التريندات عموما وباخد من كل القنوات واعمل ميكس .. القناة كبرت وبقيت تقريبا وقتها 70 الف مشترك بالإضافة الى ملايين الملايين من المشاهدات وكنت باطلع تريند كتير جداً ولكن شاءت الظروف ان القناة دي تتقفل فى 2018 بسبب اليوتيوب وسياساته الصارمة .. وكان عندى قناة بديلة ولكن كنت لما أبديت من 2014 يوتيوب كان معايا خالي هو ما شاء الله قناته عدت المليون فلما قناتي اتقفلت قلت له شغلها لى ولكن اتقفلت برضه ساعتها حسيت باكتئاب فظيع لدرجة ماكنتش بأنام .. كانت بتدخل لي دخل محترم ولكن بصراحة كان هدفي وحلمي انى أوصل 100 الف متابع علشان استلم الدرع لما خالي استلم الدرع كان عندي شغف انى أوصل للحلم ده لدرجة فكرت أروح اشتري منة الدرع ولكن قلت لا .. المهم فكرت وكلي إصرار انى أكمل وطبعا فىه تفاصيل كتيرة يطول شرحها ولكن الحمد لله انى وصلت لكده اللحظة اللى باتكلم فيها دلوقتى ..
= ماحدش شجعني .. كنت لما باشوف فيديوهات بتتكلم على الربح بيجيلي إصرار انى اشتغل وكان خالي معايا انا اللى عرفته الطريق ويمكن ده اللى مزعلني اعرفه وهو يسبقني ده اللى شجعني انى أكمل .. واتعلمت حاجات كتير زي مثلا انى لو صدقت نفسي انى هقع أكيد هقع ومش هكمل ولو صدقت نفسي انى هوصل أكيد هوصل وهكمل فكنت متوقع النجاح بصراحة والحمد لله بالدعاء ربنا جبرني ..
= راسم لنفسي خطوات اكبر من اليوتيوب انى ابقي مذيع تليفزيوني ومؤثر كمان مش مجرد برنامج بأقدمه انا عندي طموح انى أغير من المستوي ده وربنا يقدرني وأوصل لتحقيق حلمي .. وطبعا بالإضافة انى أكمل ومابصش لاي انتقادات سلبية ..
= الطلبات اللي طلبها المتابعين مني اغلبها الدعم وكتير عاوزني ادعمهم ده العادي وباحاول أساعد اكبر قدر ممكن منهم ..
= أطرف موقف وبيتكرر كتير اني أصور وانسي انى أحط المايك والاكتر من كده انى ساعات بانسي اشغل الكاميرا وأكون عملت أعلى أداء ممكن فى الفيديو واكتشف انى ماكنتش باصور .. اما أصعب المواقف انى كنت لما باتكلم عن قضية معينة بيجيني تهديدات غريبة الشكل اول واحد توعد انه هيضرني وانا باشوف الأمور دي عادية من منظور قد أكون مخطئ وأراجع نفسي كويس ..
= أهم احلامى أحب أحققها على اليوتيوب انى أكون شخص مؤثر بالإيجاب وأوصل لأكبر قاعدة جماهيرية علي الرغم انى مش بأحب الشهرة ولا أتمني انى أكون مشهور .. وأحلامي المستقبلية انى أكون فى التليفزيون ولكن مش بصورة مباشرة أكون خلف الستار اعد برنامج او ما شابه ذلك ولكن انا دلوقتى اتحطيت فى حتة اني أتكلم وأواجه الناس لازم أكون مصدق نفسي علشان أوصل .. انا عارف ممكن يكون فيه كلام عكس بعضه ولكن انا لسه فى البداية وأكيد كل حاجة هتترتب وربنا هيكرم بالأفضل ..
= الفيديوهات اللي فرقت معايا لما أتكلمت عن مسلسلات رمضان وباقول رأي فى التمثيل وكده وكنت باتوقع الاحداث دي كانت البداية بعدها توالت التريندات وبدأت أكون عندي سبق صحفي وعنوان جذاب وعرفت أكون عندي الأسلوب الخاص بي وطورت على قدر المستطاع من نفسي لأكون شامل ..
