معلومه تهمك وانتى مقبله على الزواج بقلم /داليا حسام

بقلم /داليا حسام
مخطوبه وقربتى تتجوزى
بتبقى مشغوله ومتلخبطه وحاسه دايما ان فى حاجه ناقصاكى استنى ..✋…. وركزى شويه وامسكى ورقه وقلم وحددى اولوياتك . ❤
اولا وانتى بتشترى هدوم الخروج دايما اعملى حساب ان جسمك بيتغير شويه بعد الجواز فبلاش تجيبى الحاجه مقاسها بلظبط لانك هتلاقيها بعد شويه مركونه ومش هتتلبس
ثانيا : انتى عروسه يعنى إذا كانت طبيعتك بتحبى تلبسى الوان غامقه او ماشيه على وتيره واحده فى لبسك بنطلون جينز مثلا وشيميز او تيشرت … استنى ✋
لازم تغيرى ده علشان تحسى انك مختلفه
ثالثا : وانتى بتشترى هدوم الخروج اهتمى بمكملات الاناقه بتغير شكل اللبس وبتديله اناقه كمان
طب هتقولى هعمل بيها ايه 😀 هقول ❤
هتستخدميها فى لبسك اللى موجود عندك اللى اكيد هتلاقى فيه حاجات كتير هتنفعك اذا غيرتى شكله بحاجات بسيطه 🎀
وانتى بتشترى شنطك وشوزاتك دايما هاتى الالوان الاساسيه
الاسود…… الكافيه او البيج … اللونين دول بيمشو مع معظم الالوان لكن كمان استنى ✋
فى لونيين بيبقى مهمين جدا

السلفر …….. والشامبيه او الدهبى المط
من الالوان الحياديه جدا اللى وجودهم فى دولابك هيفرق معاكى كتير لانهم الوان صيفى وشتوى
اذا كنتى محجبه اهتمى بالوان الطرح اللى تنور وشك بلاش الطرح الليكرا واهتمى دايما ان الطرحه متكونش مربوطه بطريقه تبين عيوب وشك اذا
كان رفيع وطويل او مدور ومليان علشان ده بيفرق كتير فى شكلك الكلى
تعالى بقى للهدوم اللى هتقبلى بيها ضيوفك ❤

لازم تهتمى بهدوم الاستقبال
لانك بتحتاجيها فى الفتره الاوله من الجواز ممكن تكون بين عبايات استقبال شيفون وبنطلونات مريحه وتيشرت حسب طبيعه الحضور اقارب او اصدقاء
خلاص مسافر تتفسحى طيب هتاخدى ايه معاكى 😍
وانتى بتحضرى شنطه سفرك لل honeymoon فكرى انك تاخدى معاكى فساتين لفتره الصبح بالوان زاهيه وومكن عليها جاكت جينز بيديها شكل لذيذ
مهم كمان تختارى لبس يكون طبيعته مبتحتجش مكوه لانك مش هيكون عندك مساحه لده وانتى بتحضرى شنطتك خلى لبس الخروج على الوش علشان تضمنى يفضل مفرود لغايه ما تعلقيه
خلى معاكى اكتر من slippers بالوان مختلفه للفتره الصباحيه علشان هيكون اخف واسهل بلنسبالك
اختارى شنطتين كبار لفتره الصبح بالوان مبهجه من الكتان او الجينز يناسبو البلاج
وممكن شنطه واحد لفتره بليل تكون سلفر مط او جولد مط علشان تمشى مع كل لبسك

قسمى لبسك فى دولابك من اول يوم بين
لبس صباحى
لبس مسائى
لبس مناسابات
علشان ده هيريحك كتير وانتى خارجه وهتتعودى ان ده يكون شكل دولابك
متجبيش فساتين سواريه بعدد كبير كفايه اتنين او تلاته
علشان دايما المناسبات بتبقى مش كتير وهتلاقى موديل الفستان بقى قديم بعد فتره ومش حبه تلبسيه كمان جسمك هيتغير والفستان هيكون مش مناسب عليكى
بتهيآلى كده قولتلك معظم الحاجات اللى ممكن تشغل بالك

شكلك واناقتك عنوان شخصيتك

خليكى بسيطه وشيك فى نفس الوقت
كل ما تكونى بسيطه بتكونى اشيك ومريحه للعين اكتر
جمالك وشياكتك فى بساطتك