كنت قاعدة انهارده وسط مجموعه صحاب… ضحك، هزار، والوقت بيعدي كأنه هوا… ويك اند بقا بعد اسبوع شغل طويل وممل.
وفجأة… لاحظت ان حد فيهم مش زي عادته ساكت و سرحان.. سالته مالك ؟ فيك ايه انهارده؟
ابتدا يحكي، وبصراحة صدمتني حكايته و خلاني اركز معاه لدرجه إني مبقتش سامعه غيره.
قال لي وهو بيضحك ضحكة باهتة:
أصلها وحشتني ونفسي ترجع
هي كانت دايما بتكسرني…
و تهيني قدام الناس، دايما كانت تحسسني إني قليل..
أني مش راجل كامل… دايما كانت تقصد تحرجني قدام أصحابنا تتريق علي اي تصرف بعمله ، وعلي كل كلمه بقولها ،علي لبس أنا لابسه دي حتي كانت ممكن توجعني بكلام يخليني معرفش أنام ليله كامله وابكي وأنا لوحدي..
وفي الآخر سبتني .. بعدت عني بدون اي مقدمات
و رغم كده، لسه بحبها، و هفضل مستنيها ترجع
بصيت له وسألته وأنا في حاله ذهول مش مصدقه اللي بسمعه:
يعني إيه تحب واحده تدوس على كرامتك؟
يعني إيه تموت على واحدة كانت دايما شايفه أنك نكرة وقليل؟
هو سكت… وأنا فضلت أفكر:
اقرأ أيضاً: التسليم فن الراحه وسط الزحمه .. سلّموا… تسلَموا
هو في رجالة بتحب الست اللي تفضل تحقر منهم؟
اللي تشوف نفسها أكبر وأحسن منهم؟
اللي تكسرهم وهبي فخوره بده؟
طيب لو في… رجالة كده دي اسمها إيه؟!
هل ده حب بجد؟
ولا تعلق مرضي؟
ولا ده خوف من الوحده؟
ولا الشخص ده اتربي علي الاهانه وقله الكرامه ؟
ولا هو نوع من الرجالة السادي يحب “اللي بتوجعه”، و تدوس عليه عشان هو مش قادر يصدق إنه يستحق الاحسن ؟
هل دي قله ثقه في النفس ولا عقد ونقص جواه من تجارب وماسي قديمه في حياته وهو لسه طفل والسبب فيها امها أو أبوه؟
اقرأ أيضاً: ورشة متخصصة في تصميم الأزياء بتوقيع ” ريم العدل ” بمهرجان “منصات”
هل هو شايف أن الحب تضحية، بس اللي بيدوس على نفسه عشان حد مهما كان بيحبه… دي مش تضحيه ده موت بطيء.
انتم شايفين الشخص ده ازاي و يا ترى ده بيحب فعلا ولا مريض نفسيا هل قابلتم الحاله دي قبل كده ولا أنت نفسك الشخص ده.. محتاجه اعرف رايكم؟
من قلب وجع شفته في الواقع… ولا يمكن أنساه
