نقطة ومن أول السطر …. ياترى يابكرة؟؟؟؟
في يوم من ايام عام 2080 ….
يدور الحوار التالي
بين جد وحفيده
الحفيد _
هاي جدو شيري . . إزيك
إيه اللبس الغريب اللي انت لابسه ده؟؟؟ ..
بادي ؟؟؟
ده موضة قديمة قوي
الجد _
ياابني انا بالبس زي جيلنا ما اتعود وبعدين الواحد لازم يلبس قيمته برضه
الحفيد_
أيوة بس مش حاسس بانك محتاج تفك شوية ياجدو
الجد_
أبدا ياابني ده اللبس المحتشم اللي لازم نلتزم به ومناسب لأخلاقنا وعاداتنا وتقاليدنا
فين ياابني ايام ماكنا بنليس بادي يادوب مبين البطن . . والبنطلون الجينز يادوب كده بس كام فتحة فيه عشان بس نحس بالفقير لما يلبس مقطع .. روح حلوة كده اجتماعية وفي نفس الوقت روشنة
الحفيد_
ياااااااااااه ياجدو ده انتم كان لكم افكار غريبة قوي ايه ده
الجد_
امال ياابني . . هي ايامكم دي أيام. .
ياابني هو احنا كان فينا حد يستجري يشرب سيجارة البانجو والا يسحب له سطر بودرة قدام ابوه
طب ده كان ممكن ابوه يزعل منه وامه ماترضاش بعد كده تشيش معاه
أصل الأمهات كانت بتأدب ولادها وتحافظ عليهم قوي وتمرنهم عالشيشة بس من غير تحبيشة
أمال كان فيه أخلاق
الحفيد_
معقول ياجدو … ده حاجة وحشة جدااااااااااااااااا ايه التقفيل اللي كنتم فيه ده
الجد_
أمال انت فاكر ايه .
وبعدين كانت الستات حشمة .. الجونلات يا ابني كان طولها مايقلش أبدا عن شبر ونص .. وكانوا بيلبسوا عليها كمان بلوزات
ولما يلبسوا بنطلون كان يادوب كام حتة كده مقطوعة برضه عشان يحسوا بالفقير
وكمان كان فيه محجبات جونلاتهم اطول وبلوزاتهم ساعات تبقا بكم …. وشعرهم مش باين منه غير القُصة و الخصلات الملونة
كانت أيام خير با ابني
الحفيد_
ياخبر
وإيه كمان ياجدو
الجد_
اقول لك ايه بس يا ابني .. يا ابني احنا كنا نصرف في الشهر بكتيره تلاتين الف اربعين الف بعُملة وقتها حاجة كده كان اسمها الجنيه ..
كيلو اللحمة كان بتسعين جنيه بس .. والفرخة يادوب سبعين تمانين
الحفيد_
ياه ده ايه الرخص ده يابختكم
الجد_
أمال ايه بس .. والفن بقى كان على ايامنا فن محترم طرب أصيل الأستاذ عمرو دياب و الأستاذ تامر حسني وأساتذة محترمين ..
والا الست نانسي .. والست إليسا .. والست آه ياليل بلاش يانيل عشان التلويش بس
كانت الأغنية مدتها دقيقتين واكتر والله
أغاني تعمر النافوخ
الحفيد_
كلامك حلو ياجدو عيشتني في ايام زمنكم الجميل بتاع بدايات القرن ده .. كمل ياجدو
الجد _
لا يا ابني .. الواحد تعب لما افتكر ايامنا القديمة
ربنا يا ابني يستر من اللي جاي
اسيبك بقى احسن معاد الجيم جه
وهكذا يمضي الجد إلى حال سبيله عشان يلحق كورس الزومبا
وهي رياضة قديمة اعتاد عليها في عصرهم القديم عشان خشونة الركب
وسلام عليكم بقا
ونقطة
ومن أول السطر
======================
فاتن فتح الله نصر
