وجع الهم …. بقلم / سيد جعيتم
وجع الهم
شعر / سيد جعيتم
وجع الهم
الهم كاسي ووجعه صعيب
والرزق طبعه قليل وشحيح
واللقمة صعبة والطعم غريب
والظلم خلا النفوس مجاريح
البير ميته شحت وطعمها مرر
وانا عطشان ولا قادر ابوح
ولا اعبر
حتى صبايا البلد عشقها عكر
وبوح العذارى صبح مجروح
سنين ضاعت في العلام
وانا غلبان
لا عندي واسطه ولا واصل
ولا ابن بيه
بقيت عاطل
والشهادة علقتها بفتلة خيط
جنب صورتي علي الحيط
اتاري احلام الفقير اوهام
المزيد من المشاركات
قلت اسافر
في الغربة عشت عيشت العبيد
وظلم الكفيل ويا الألم بيزيد
قلت ارجع
بلدي لو زادها ملح وعيش
تحلالي وتسترني هدمتها
حتى لو كانت خيش
راجع يا بلدي أعمر دروبك
وأغزلك من حنيني توبك
واكونلك بذرة و ازرعلك
واخضرالك واحصدلك
واقدملك سنين عمري
فدا حبة من رملك
سيد جعيتم
