ورقة اللحمة مقدمة من الشيف ندي العسال

كتبت نهي مرسي حمامة

مدة التحضير : ١٥ دقيقة
مدة الطهى : ساعة وربع

المقادير :-
كيلو لحمة موزة كندوز او كولاطة
خضار مشكل ( بطاطس مكعبات . بصل جوانج . فلفل الوان اصفر واحمر واخضر عادى وحامى . كوسة دواير . جزر مكعبات كبيرة . طماطم مكعبات ) وممكن نستغنى عن اى حاجة فيهم لو مش متواجد
التوابل المستخدمة : حبهان . ورق لورى . ملح . فلفل . قرفة . جنزبيل . توم بودر . زعتر
خل وعصير ليمون وزيت .
ورق زبدة وورق فويل .
نصف كوب ماء .

الطريقة :
– قطعى اللحمة مكعبات متوسطة لو هى كبيرة حجما . وياسلام لو معاها حتة لية هتخلى الريحة تجنن
– افرشى صنية فرن او طاجن بورق الالومنيوم وجواه ورق الزبدة بحيث يكون طالع من الجوانب عشان هنقفله على اللحمة .
– حطى اللحمة مع كل الخضار اللى تحبوه يعنى ممكن تشيلوا من اللى مكتوب اوتزودوا عليه وكله هيدى قيمة غذائية عالية.
– تبلى المكونات بكل التوابل الموجودة ووزعى الماية و الزيت والخل وعصير الليمون عليهم .
– اكمرى اللحمة بالخضار واقفلى عليها كويس اوى بورق الزبدة والفويل .
– دخليها الفرن يكون سخن من قبلها على 200 درجة لمدة ساعة فى رف قريب من تحت .
– اخر خمس دقايق افتحى الورق وولعى الشواية تخلى اللحمة والخضار ياخدوا لون بسيط .
– طلعيها وقدميها مع ارز معمر او ارز ابيض وسلطة وعيش .وبتتقدم زى ماهى بورقها .