ورِجِعت أَقلِب فِـ الماضي
بقلم: مبروك علوه
بَحبِّك أيوه أنا بَحبِّك
وَرغمِ البُعد مِش ناسي
وحُبِّك جُوّا قَلبي ساكن
برغم إنك حبيبي ناسي
صَبَرت سِنين على بُعدِك
يا ساكن جُوّا نِنّ العَين
وقُلت يُمكن في يَوم تِرجَع
ويِحنّ قلبِك القاسي
صَبَرت كتير على الأوجاع
وقُلت قَلبِك خَلاص باع
وفُجِئت لقيتِك قُدّامي
انقَطعِت جُوّايا أنفاسي
قُلت أبعَتلك طَلَب وأشوف
ووشّي أحمَر مِن الكُسوف
وقَلبي بيِنتَفِض مِن الخوف
وشِربت الصَبر مِن كاسي
المزيد من المشاركات
لَقيت رَدّك عَلَيّا جَميل
والقَلب ليكِي رِجِع يَميل
مِن الفَرحَة نِسيت الكَون
ومَلَكتي كُلّ إحساسي
وبِكَلِمَة مِنك رِجِعْت سِنين
والقَلب مَلاهُ الحَنين
والفَرحَة هَفهَفِت حَوالَيّا
ونِسيت جِراح ومآسِيَّ
ورِجِعت أَقلِب فِـ الماضي
وشُفت صُورْتِك قُصادي
عَروسة فِـ سِنّ العِشرين
ده حُبِّك ساكن إحساسي
هفضل أحبّك زي زمان
ولو كان الطريق قاسي
ده حبّك عمره ما يضعف
ولا يتبدّل إحساسي