يا صاحبي يا خِلِّي  

بقلم.. الشاعر كامل بدرخان

بقى يا صاحبي يا خِلِّي
عايز بيَّا تحَلِّي
توقعني في قعر الحَلة
وبعدين عني تتخَلى
توقعني في شر أعمالي
وتنكر وتقول وأنا ما لي
صرفت عليك أنا مالي
شِطانك أعماك وأعماني
وتيجي عليا وتتجنَّى
توديني النار بدل الجنة
يا اللي ما عندك حلول
الأصول
إنك تكون إبن أصول
لأني صاحبك وإبن الأصول
لا تجول في عقلي وتصول
وتلعب بيا ومش مسئول
كنت قول مِن الأول
وقبل صُحبتنا ما تطَوِّل
تحارب علشان أتحول
عن الهُدى وأبقى أحول
صُحبتك شَلِّتني
وشِلتك سَلِّتني
سحبتني مِن نَفسي
ويا ما كان نِفسي
أفضَل زي ما أنا كدا
متعوِّد ع الرضا
دا قدر الله والقضا
نفد فينا وانقضى
أخدت وقت لمَّا عرفتك
ونادم على معرفتك
ما أنا لازم كنت أختار
وخَيري أكيد غير مختار
لو من الأول كنت تقول
كنت سيبتك ومشيت ….. علطول