الضغط المنخفض أخطر أم الضغط المرتفع.. وما هي الطريقة المثلى لعلاجه
الضغط المنخفض أخطر أم الضغط المرتفع.. وما هي الطريقة المثلى لعلاجه
بقلم: د . خالد حامد
ماهو الضغط المنخفض وماهو الضغط المرتفع وما هي الطريقة المثلى للعلاج ومتى يصبح مريض الضغط في حالة خطرة.
في البداية تعالي نتفق علي أن الضغط المثالي أقل من ١٢٠/٨٠ ويا سلااااام لو ١١٠/٧٠.
– الضغط المنخفض أقل من ٩٠/٦٠
– الضغط المرتفع أكثر من ١٤٠/٩٠
– الضغط المنخفض لو مش عامل أعراض “مش لازم” تعالجه وعيش حياتك.
– الضغط المرتفع لو مش عامل أعراض ” لاااازم ” تعالجه وعيش حياتك بردو.
– الضغط المنخفض لا يسبب تلف بأنسجة الجسم ولا له مضاعفات جانبية خطيرة على المدى البعيد (ودة اهم حاجة).
– الضغط المرتفع يسبب تلف بأنسجة الجسم زي العين والمخ والكلى والقلب وله مضاعفات جانبية خطيرة.
– الضغط المنخفض أعراضه دوخة وتعب مع أقل مجهود وشعور بالإغماء خصوصا مع الوقوف مدة طويلة أو التعرض لحرارة الشمس وعدم القدرة على التركيز.
– الضغط المرتفع( لو عمل أعراض) يبقى ستر ربنا علشان تعرف وتعالجه قبل مايعمل مشكلة، أعراضه قد تكون صداع أو نزيف من الأنف أو ألم بالصدر أو لغبطة بضربات القلب أو وجع بالرأس وطنين بالأذن.
– الضغط المرتفع يسمى “القاتل الصامت” لأنه غالبا مش بيعمل أعراض وأول مرة يكتشف قد يكون بمضاعفاته زي نزيف بالمخ أو جلطة بالقلب او فشل كلوي.
قياس الضغط مهم كل ٦ شهور للاطمئنان إنك مش مريض ضغط.
– الضغط المنخفض علاجه الأساسي شرب ماء وسوائل (٣ لتر يوميا) وأكل فيه ملح معتدل وشرب فنجان أو اتنين قهوة يوميا ووراهم كوباية ماية كبيرة وتغذية سليمة والإكثار من الفواكه والخضروات وممارسة الرياضة لتقوية عضلات الجسم وخصوصا الساقين وأخر حاجة نلجأ لها العلاج الدوائي.
– الضغط المرتفع علاجه الأساسي قرص الضغط بجانب غذاء قليل الملح والدهون وتجنب الضغط العصبي والتوتر وممارسة الرياضة والامتناع عن التدخين مع عمل تحليل وظائف كلى وكولسترول وصورة دم ورسم قلب وايكو.
– ٩٠% من أسباب الضغط المرتفع ورث عن بابا وماما (وراثية وجينات) وعلاجه انك ترجع بالزمن وتغير بابا وماما أو تضطر أسفاً تكشف وتاخد العلاج.
العلاج للضغط المنخفض اختيارى، إنما العلاج للضغط المرتفع إجباري.
اللي يقولك علاج الضغط المرتفع بالكركدية وماتخدش دواء علشان ماتتعودش عليه هو صاحب نظرية (نعالجك ليه طالما نقدر نموتك ؟
